हामी सबैकाे संसारन्यूज

काठमाडौं । निर्वाचन आयोगले स्थानीय तहको चुनावका लागि बनाएको आचार संहिता राजपत्रमा प्रकाशित भएको छ । केही कडा प्रावधानसहित जारी गरिएको आचारसंहितमा चुनाव प्रचारप्रसारमा निकै कडाई गरिएको छ ।

आयोगले जारी गरेको आचार संहितामा आमसभामा भाग लिने तथा प्रचारप्रसार गर्नेले दलको निर्वाचन चिह्न वा झण्डा अंकित लोगो वा टोपी, टिसर्टलगायत प्रयोग गर्न नपाउने भएका छन्।

“जुलुस वा आमसभामा भाग लिने वा प्रचार प्रसार गर्ने व्यक्तिले दलको निर्वाचन चिह्न वा झण्डाअंकित लोगो वा स्टिकर वा कपडा, टोपी वा क्याप, भेष्ट, टिसर्ट, ज्याकेट, कमिज, गम्छा, व्याच, मास्क वा लकेट लगाउन वा झोला बोक्न हुँदैन”, आयोगले जारी गरेको निर्वाचन आचार संहितामा भनिएको छ ।

तर, उम्मेदवारले ए फोर साइजको कागजमा आफ्नो व्यक्तिगत पहिचान (बायोडाटा)को विवरण खुलाई वितरण गर्न बाधा नपर्ने उल्लेख छ ।

आयोगले निर्वाचन प्रचार–प्रसारमा केन्द्र र प्रदेशका मन्त्रीलाई पनि सहभागि हुन रोक लगाएको छ । साथै, स्थानीय कार्यपालिकाका पदाधिकारीहरु पनि कुनै दल वा उम्मेदवारको पक्ष वा विपक्षमा प्रचार प्रसारमा सहभागि हुन नपाउने आचार संहितामा उल्लेख छ ।