हामी सबैकाे संसारन्यूज

काठमाडौं । निर्वाचन आयोगले आज साँझ ५ बजेसम्म उम्मेदवारी फिर्ता लिन सकिने जनाएको छ । आयोगले आज नै उम्मेदवारको अन्तिम नामावली प्रकाशन गर्ने पनि तयारी गरेको छ ।

आयोगले जनाएअनुसार उम्मेदवारी फिर्ता लिन चाहनेले साँझ ५ बजेसम्म निर्वाचन अधिकृतको कार्यालयमा पुगेर नाम फिर्ता लिन सक्नेछन् ।

निर्वाचन आयोगले जनाएअनुसार स्थानीय निर्वाचनका लागि एक लाख ५३ हजार १४५ जनाले उम्मेदवारी दिएका छन् । जसमध्ये प्रमुखमा ३ हजार ५१८, उपप्रमुखमा दुई हजार १७४, अध्यक्षमा तीन हजार ३९२ र उपाध्यक्षमा दुई हजार ४०७ जनाको मनोनय दर्ता भएको छ । त्यसैगरि वडाध्यक्षमा ३५ हजार ३८०, महिला सदस्यमा २६ हजार ५५६, दलित महिला सदस्यमा २३ हजार ९५१ र सदस्यमा ५५ हजार ७६७ जनाको मनोनयन दर्ता भएको आयोगले जनाएकाे छ ।

आज उम्मेदवारकाे अन्तिम नामावली प्रकाशन गर्ने र भोली उम्मेदवारलाई चुनाव चिन्ह प्रदान गर्ने आयोगकाे तयारी छ ।

दलहरुले बागी उम्मेदवारी दिएकालाई फिर्ता लिनको लागि दबाब दिँदै आएका छन् । मुख्यतः सत्ता गठबन्धनभित्र साझा उम्मेदवार बनाउने प्रर्यत्नका बीच धेरैको बागी उम्मेदवारी परेको छ । गठबन्धनका दलहरुले बागीलाई उम्मेदवारी फिर्ता लिन निर्देशन नै जारी गरेका छन् ।