हामी सबैकाे संसारन्यूज

काठमाडौं । नेकपा (माओवादी केन्द्र) को आज ११ बजे बस्ने केन्द्रीय समितिको बैठकमा पार्टी अध्यक्ष पुष्पकमल दाहाल ‘प्रचण्ड’ ले जवाफ दिने कार्यक्रम रहेको छ ।

राजधानीको कमलादीस्थित प्रज्ञा भवनमा असार १९ देखि २१ सम्मका लागि बोलाइएको केन्द्रीय समितिको बैठक १९ र २० गते बसेर स्थगित भएको थियो ।

बैठकमा उपस्थित अधिकांश केन्द्रीय सदस्यले बैठक लम्ब्याएर भएपनि पदाधिकारी चयन प्रक्रिया सक्नुपर्ने दवाव दिएपछि अध्यक्ष प्रचण्डले पदाधिकारी चयनका लागि २१ गते खुमलटारमा पूर्वस्थायी समितिको बैठक बोलाएका थिए । बैठकले पदाधिकारी चयनको जिम्मा प्रचण्डलाई नै दिएका थिए ।

प्रचण्डले आज २३ गते नेता तथा कार्यकर्ताबाट उठेका प्रश्नको जवाफ दिने र पदाधिकारी तथा पोलिटव्युरो समेत आजै चयन गर्ने सम्भावना रहेको छ ।

गत पुष ११ देखि १५ गतेसम्म राजधानीमा आठौ राष्ट्रिय महाधिबेशन सम्पन्न गरेको माओवादी केन्द्रले तत्कालीन समयमा २३६ सदस्यीय केन्द्रीय कमिटी बनाएको थियो । सोहि कमिटीको पहिलो बैठकले पार्टीको अध्यक्षमा प्रचण्डलाई सर्वसम्मत अध्यक्ष मानेको थियो भने बाँकी पदाधिकारीहरुको टुंगो लाग्न सकेको थिए ।