हामी सबैकाे संसारन्यूज

काठमाडौं । प्रधानमन्त्री शेरबहादुर देउवा र प्रमुख प्रतिपक्षी दल नेकपा एमालेका अध्यक्ष केपी शर्मा ओलीबीच भेटवार्ता भएको छ ।

झण्डै ६ महिनापछि बुधबार बिहान प्रधानमन्त्री निवास बालुवाटारमा भएको देउवा र ओलीद्धयको भेटमा एमालेका नेताहरू सुवास नेम्वाङ र विष्णु पौडेल लगायतका एमाले नेताहरु समेत उपस्थिति रहेको थियो ।

उक्त भेटवार्ता सकारात्मक भएको सरकारका प्रवक्ता ज्ञानेन्द्र बहादुर कार्कीले जानकारी दिएका छन् ।

उक्त भेटवार्तामा एमाले अध्यक्ष ओलीले आगमी निर्वाचन, शान्ति प्रक्रिया, मूल्यवृद्दि लगायतका विषयमा प्रधानमन्त्रीको ध्यानाकर्षण गराएको बताइएको छ ।

अध्यक्ष ओलीले आगामी मंसिर ४ गते हुने प्रतिनिधिसभा र प्रदेशसभा निर्वाचनको मिति तय तथा घोषणाका सम्बन्धमा आफुहरुसँग कुनै परामर्श नगरेको गुनासो गर्दै ओलीले निर्वाचन निष्पक्ष, धाँधलीरहित हुनुपर्नेमा देउवाको ध्यानाकर्षण गराएको बताइएको छ ।

त्यसैगरी शान्ति प्रक्रियालाई तार्किक निष्कर्षमा पुर्याउन ध्यानाकर्षण गराएको तथा राष्ट्रपतिले पुर्नविचारका लागि संसदमा फिर्ता गरेको नागरिकता विधेयक छलफलै नगरी हुबहु पारित गरिएको विषयमा पनि ध्यानाकर्षण गराएका गिए ।

त्यस्तै पछिल्लो समय महँगी बढ्दै गएकाले जनजीविका प्रभावित भएको अवस्थामा त्यसका लागि सरकारले पहल नगरेको भन्दै ध्यानाकर्षण गराएको समेत बताइएको छ ।

उक्त भेटमा प्रधानमन्त्री देउवाले ओलीले राखेका कुराहरु सकारात्मकरुपमा लिर्दै गठबन्धनमा कुरा राख्ने बताएको प्रवक्ता कार्कीले जानकारी दिएका छन् । साथै प्रधानमन्त्रीले ‘निष्पक्ष चुनाव गराउन सरकार प्रतिवद्ध रहेको विश्वास व्यक्त गरेका थिए ।