Sansar News
काठमाडौं । काठमाडौं महानगरपालिकाका मेयर बालेन्द्र साहले राजधानीमा रहेका विभिन्न अवैद्य संरचना भत्काउने अभियानको थालनी गरेका छन् ।
यसअघि नर्भिक अस्पतालमा बनेको अवैद्य संरचना भत्काउन आदेश दिएका मेयर बालेनले मंगलबार बानेश्वर चोक क्षेत्रमा रहेका अवैद्य संरचना भत्काएका छन् । सोहि अभियानलाई निरन्तरता दिँदै बालेनले बुधबार पुनः डोजर अभियान संचालन गरेका हुन् ।
काठमाडौंमा नक्शा पास नगरी अवैद्य रुपमा बनाएर व्यवसाय संचालन गरिएका संरचनामा डोजर चलाउन सुरु गरेका बालेनले बुधबार बिहान सुन्धारास्थित काठमाडौं मल, आरबि कम्पलेक्स तथा रन्जना गल्लीमा रहेका संरचना पनि धमाधम भत्काएका हुन् ।
काठमाडौं उपत्यका ट्राफिक प्रहरी प्रमुख मीरा चौधरीसहित फिल्डमै पुगेका मेयर साहले नक्सा पास गर्दा भन्दा अन्य प्रयोजनका लागि संरचना बनाइएको भन्दै अवैद्य संरचना भत्काउने अभियानमा लागेका हुन् ।
मेयर साहले महानगरले यसअघि संरचना खाली गर्न ३५ दिने सूचना निकालेर जानकारी दिइएको समेत बताएका छन् ।
वि.सं.२०७९ भदौ ८ बुधवार १४:१२ मा प्रकाशित
