हामी सबैकाे संसारन्यूज

काठमाडौं । यती एयरको विमान दुर्घटनाका विषयलाई संसदको कार्यसूचीमा नपारेको भन्दै नेपाली कांग्रेसले आपत्ति जनाएको छ ।

विमान दुर्घटनापछि पहिलो पटक बसेको संसदको बैठकमा नेपाली कांग्रेसका सांसद रमेश लेखकले माघ १ गते पोखराको सेती खोचमा खसेको यती एयरलाईन्समा ७२ जनाको ज्यान बताउदै सरकाले यस विषयमा संसदमा जानकारी गराउनुपर्ने बताए ।

‘ यत्रो ठूलो हवाई दुर्घटना भइसकेपछि देशभित्र र अन्तराष्ट्रियरुपमा यति ठूलो चासो र चिन्ता अभिव्यक्त भएको र धेरै ठूलो पीडा भोगिरहेको बेला यो विषयमा आजको बैठकमा सरकार यो विषयमा प्रस्तुत हुनेछ,’ उनले संसदमा सम्बोधन गर्दै भने, ‘के भएको थियो र अहिले के भइरहेको छ भन्ने सरकारले सदनलाई जानकारी गराउछ भन्ने थियो तर दुःखका साथ भन्नु परेको छ आजको कार्यसूचीमा यो कुरा छैन ।’

उनले आजका कार्यसूचीका विषय स्थगित वा केही समयपछि राखेर यस विषयमा सदनलाई जानकारी गराउन सरकारलाई निर्देशन गर्न सभामुखको ध्यानाकर्षण गराएका थिए ।

उनले दुर्घटनामा मृत्यु हुनेको शव सबै खोजी गरिए पनि अझै पनि आफन्तले शव बुझन नपाएको बताए । आफन्तमा थप पीडा र आक्रोश उत्पन्न भएको बताउँदै यस घटनाले नेपालको पर्यटन क्षेत्रलाई नराम्रोसँग प्रभावित गरेको समेत बताए ।