हामी सबैकाे संसारन्यूज

काठमाडौं । निर्वाचन आयोगले उपराष्ट्रपति निर्वाचनका लागि अन्तिम नामावली सार्वजनिक गरेको छ ।

आयोगले आइतबार अपरान्ह सार्वजनिक गरेको नामावलीमा शनिबार उपराष्ट्रपतिका लागि उम्मेदवारी मनोनयन दर्ता गराएका चारैजनाको नाम सार्वजनिक गरेको हो ।

निर्वाचन अधिकृतको कार्यालयले राष्ट्रपति तथा उपराष्ट्रपतिको निर्वाचनसम्बन्धी ऐन २०७४ को दफा २३ अनुसार उम्मेदवारको नामावली सार्वजनिक गरेको हो । जसमा जनता समाजवादी पार्टीबाट उपराष्ट्रपतिमा उम्मेदवारी दिएका नेता रामसहाय यादव, नेतृ प्रमिला यादव, एमालेकी नेतृ अष्टलक्ष्मी शाक्य र जनमत पार्टीकी नेतृ ममता झाको नाम समावेश छ ।

यसअघि शनिबार एमाले र जनमतबाट उपराष्ट्रपति पदमा उम्मेदवारी मनोनयन दर्ता गराएका नेतृद्वय शाक्य र झाले जसपाका रामसहाय यादव विरुद्ध उजुरी दिएका थिए । शाक्य र झाद्वयले दिएको उजुरीमा यादवको उम्मेदवारी संविधान विपरित रहेको उल्लेख थियो ।

उक्त उजुरीमा निर्वाचन अधिकृतको कार्यालयले आइतबार सहायको उम्मेदवारी कायम रहने निर्णय गरेपछि आज चारैजना उम्मेदवारको नाम सार्वजनिक गरेको हो ।

जसपाको फागुन २५ गते बसेको केन्द्रीय कार्यकारिणी समितिको बैठकले जसपाका संसदीय दलका नेता यादवलाई उपराष्ट्रपतिको उम्मेदवार बनाउने निर्णय गरेको थियो । यद्यपी आयोगले संविधान अनुसार उपराष्ट्रपतिमा खस आर्य समुदायबाट पुरुष निर्वाचित भइसकेको अवस्थामा उपराष्ट्रपति फरक लिङ्ग र समुदायको हुनुपर्ने सूचना जारी गरेपछि जसपाले महिला उम्मेदवारको रुपमा प्रमिला यादवलाई उपराष्ट्रपतिको उम्मेदवार वनाएको हो ।

सत्ता साझेदार दलबीच सहमतिमै उपराष्ट्रपतिको उम्मेदवारको टुंगो लगाउने प्रयत्न भइरहेको बताइएको छ ।