हामी सबैकाे संसारन्यूज

काठमाडौं । सभामुख देवराज घिमिरेको सरकारी निवासमा बसेको कांग्रेस, एमाले र माओवादी केन्द्रका शीर्ष नेताहरुको बैठक सकिएको छ । सभामुखको समन्वयमा तीन दलबीच भएको बैठकमा सत्य निरूपण तथा मेलमिलाप (टिआरसी)लगायतका विधेयकलाई सर्वस्वीकार्य बनाउने सहमति भएको छ ।

सभामुखका प्रेस विज्ञ श्रीधर न्यौपानेले जानकारी दिएअनुसार सत्य निरूपण तथा मेलमिलाप (टिआरसी)लगायतका विधेयक न्यायपूर्ण र सर्वस्वीकार्य बनाउने सहमति भएको छ । उनका अनुसार नेताहरुबीच यस सन्दर्भमा नियमित छलफल गर्ने सहमति पनि भएको छ ।

साथै, तीन दलका नेताहरु संयुक्त समिति र अन्य समितिको नेतृत्व र प्रतिनिधित्व पनि सहमतिमा टुंगो लगाउन सहमत भएका छन् । विषय र प्रक्रियामा थप छलफलका लागि अर्को बैठक वैशाख १ गते बस्ने उनले बताए ।

सभामुख घिमिरेको निवासमा भएको छलफलमा प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीलगायतका तीन दलका नेता सहभागि थिए ।