हामी सबैकाे संसारन्यूज

काठमाडौं । नेपाली नागरिकलाई भुटानी शरणार्थी बनाएर अमेरिका उडाइने भन्दै ठगी गरेको आरोपमा तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईलाई प्रहरीले पक्राउ गरेको छ । प्रहरीले जनाएअनुसार मंगलबार बिहान राईलाई ललितपुरको सुनाकोठीबाट पक्राउ गरिएको हो ।

नेपाली नागरिकलाई भुटानी शरणार्थी बनाएर अमेरिका उडाउने भन्दै ठगी गरेको प्रकरणमा प्रहरीले पैसा असुल गर्ने समूहका केशव दुलाल, सानु भण्डारी, सागर थुलुङ राई, टंक गुरुङ र सन्देश शर्मा पोखरेललाई पक्राउ गरिसकेको छ । प्रहरीले उनीहरुको बयानको आधारमा राईलाई पनि पक्राउ गरेको हो ।

बादल गृहमन्त्री हुँदा गृहमन्त्रालयबाटै पैसा असुल गर्ने गरेको कुरा बयानमा खुलेको प्रहरीले जनाएको छ । राईले विभिन्न चरणमा गरी पाँच करोडभन्दा बढी रकम असुल गरेको अन्यको बयानबाट खुल्न आएको प्रहरीले जनाएको छ ।

पक्राउ परेका राईले सैन्य विज्ञानमा विद्यावारिधि गरेका छन् । उनी पहिलो संविधानसभाका सभासद हुन् । माओवादी आन्दोलनबाट आएका राई नेकपा विभाजनसँगै उनी रामबहादुर थापासँगै नेकपा एमाले प्रवेश गरेका थिए ।

यो गिरोहमा एमालेका महासचिव शंकर पोखरेलदेखि पूर्वउर्जामन्त्री तथा एमाले सचिव टोपबहादुर रायमाझी, पूर्वपरराष्ट्रमन्त्री एवम् कांग्रेस नेतृ सुजाता कोइरालालगायत मुछिएका छन् ।