हामी सबैकाे संसारन्यूज

काठमाडौं । ललिता निवास जग्गा प्रकरणमा अनुसन्धान गरिरहेको नेपाल प्रहरीको केन्द्रीय अनुसन्धान ब्यूरो (सीआईबी)ले प्रकरणमा जोडिएका ४०६ जनालाई पक्राउ गर्न अनुमति लिएको छ । बुधबार पत्रकार सम्मेलन गर्दै सीआईबीले पक्राउको अनुमति लिएको जानकारी दिएको हो ।

सीआईबीले मंगलबार भानभटेनी सुपरमार्केटका सञ्चालक मीनबहादुर गुरुङ, निर्वाचन आयोगका पूर्व आयुक्त सुधिरकुमार शाहसहित सात जनालाई पक्राउ गरेको थियो । तर, सर्वोच्च अदालतको यसअघिकै अन्तरिम आदेशका कारण तीन जना भने छुटे ।

अदालतबाट यसअघि नै स्टे अर्डर लिएका सुरेन्द्रमान कपाली, मालपोत कार्यालय डिल्लीबजारका तत्कालीन प्रमुख कलाधर देउजा र हुपेन्द्रमणि केसीलाई प्रहरीले कागज गराएर रिहा गरेको हो ।

सीआईबीले प्रकरणमा जोडिएका सबैलाई पक्राउ गरी अनुसन्धान अघि बढाउने तयारी गरेको छ । सीआईबीले जग्गा फिर्ता गर्ने २०९ जना, पशुपति टिकिन्छा गुठीको नाममा जग्गा दर्ता गरेका ११० जना, छुट जग्गा दर्ता गर्ने १३ जना, निवास परिसर विस्तार सट्टापट्टा तथा शोधभर्ना गर्ने ७४ जना गरी ४०६ जनालाई पक्राउ गर्ने तयारी गरेको छ ।

सीआईबीले मुलुकी ऐन २०२० अनुसार सरकारी लिखत कीर्ते गरेको आधारमा मुद्दा दायर गर्ने तयारी गरेको छ ।