काठमाडौं । पुष्पकमल दाहाल ‘प्रचण्ड’ नेतृत्वको सरकार निकै अस्थिर देखिन्छ । पटक–पटक भएका मन्त्रिपरिषद् पुनर्गठन तथा हेरफेरले पनि उनी नेतृत्वको सरकारको अस्थिरता उजागर गर्दछ ।
२०७९ पुस ११ मा नेकपा (एमाले)सहितका दलहरुको समर्थनमा प्रधानमन्त्री बनेका प्रचण्डले यो बीचमा १२ पटकसम्म मन्त्रिपरिषद् पुनर्गठन तथा हेरफेर गरेका छन् ।
प्रधानमन्त्रीमा नियुक्त हुँदा प्रचण्डलाई नेकपा एमाले, राष्ट्रिय स्वतन्त्र पार्टी र राष्ट्रिय प्रजातन्त्र पार्टीसहित आठ दलले समर्थन गरेका थिए । तत्कालिन गठबन्धन रहेकै बखत पनि प्रचण्डले पुस ११, माघ ३, माघ १४, माघ २३ र फागुन १४ मा मन्त्रिपरिषद् हेरफेर गरेका थिए ।
सरकारमा सहभागि भएको ४२ दिनमै रास्वपा केही असन्तुष्टिसहित माघ २२मा बाहिरिएको थियो । रास्वपा बाहिरिएको २१ दिनमै फागुन १३ मा राप्रपा पनि सरकारबाट बाहिरिएको थियो । सत्ताका दुई साझेदार रास्वपा र राप्रपा बाहिरिएलगत्तै फागुन १५ मा एमाले पनि सरकारबाट बाहिरियो । यीबीचमै पाँच पटकसम्म मन्त्रिपरिषद् हेरफेर भएको थियो ।
एमाले बाहिरिएपछि फागुन १६ मा प्रधानमन्त्री प्रचण्डले मन्त्रिपरिषद्लाई हेरफेर गरेका थिए ।
त्यसपश्चात सत्ता गठबन्धन परिवर्तन भयो । राष्ट्रपति निर्वाचनसँगै फेरिएको समिकरणअनुसार नेपाली कांग्रेससहितका दलहरु सत्तामा प्रवेश गरे । प्रचण्ड नेतृत्वको सरकारमा कांग्रेससहितका दश दलहरु चैत १७ मा प्रवेश गरेका थिए ।
कांग्रेससहितको समिकरण बनेपछि पनि प्रचण्डले चैत १७, २०८० वैशाख ३, वैशाख २१, वैशाख २४, जेठ ९ र साउन २९ मा गरी छ पटकसम्म मन्त्रिपरिषद् हेरफेर गरेका छन् । सोमबार मात्रै प्रधानमन्त्री प्रचण्डले माओवादी केन्द्रको तर्फबाट मन्त्रि बनेका अमनलाल मोदीलाई फिर्ता बोलाउँदै जनमत पार्टीकी अनितादेवी साहलाई संघीय मामिला तथा सामान्य प्रशासन मन्त्रालय जिम्मेवारी सुम्पेका छन् । योसँगै प्रचण्डले १२औं पटक मन्त्रिपरिषद् पुनर्गठन तथा हेरफेर गरेका छन् ।
प्रधानमन्त्रीको रूपमा सपथ लिँदा प्रचण्डसँगै भएका नारायणकाजी श्रेष्ठबाहेक अन्य कुनै पनि मन्त्री हाल बहाल छैनन् । प्रचण्डसँगै सपथ लिएका नारायणकाजी भने अहिले गृहमन्त्रालयको जिम्मेवारीमा छन् । कांग्रेससहितका दलहरु सरकारमा प्रवेश गर्दै गर्दा श्रेष्ठलाई भौतिकबाट गृहमन्त्रालयको जिम्मेवारी दिइएको थियो । अन्य मन्त्रिहरु भने पछि थपिएका हुन् ।
वि.सं.२०८० साउन २९ सोमवार १३:१८ मा प्रकाशित
