हामी सबैकाे संसारन्यूज

काठमाडौँ । काठमाडौँस्थित बंगलादेशी दूतावासले काठमाडौँमा बंगाली आँप बाँडेको छ ।   दूतावासले यस वर्षको “सिजन्स बेस्ट कम्प्लिमेन्ट्स” (ऋतुको उत्कृष्ट शुभकामना) पहल अन्तर्गत सद्भावना र मित्रताको कूटनीतिक प्रयास स्वरूप नेपालका प्रतिष्ठित मित्रहरूलाई बंगलादेशको उत्कृष्ट स्वादको आँप बाँडेको हाे।

बंगलादेश र त्यहाँका जनताका अनन्य मित्र तथा शुभचिन्तकहरू, नेपालका प्रतिष्ठित व्यक्तित्वहरू, उच्च सरकारी अधिकारीहरू, राजदूतहरू, काठमाडौँस्थित कूटनीतिक नियोगका सदस्यहरू, व्यावसायिक नेताहरू र नागरिक समाजका प्रतिनिधिहरूलाई १,७५० किलोग्रामभन्दा बढी प्रिमियम गुणस्तरको बंगलादेशी आँप उपहार स्वरूप प्रदान गरिएको थियो।

दूतावासको टोलीले नेपालका सम्माननीय राष्ट्रपति, सभामुख, मन्त्रिपरिषद्का सदस्यहरू लगायत ३६० भन्दा बढी आदरणीय प्रापकहरूलाई आँपका प्याकेटहरू पुर्‍याउन सराहनीय प्रयास गरेको थियो।

बंगलादेशको “आँपको राजधानी” भनेर चिनिने चपाइ नबाबगञ्जका दुईवटा बगैँचाबाट ताजा टिपिएका यी आँपहरू आगमनको समयमा गुणस्तर र ताजापन सुनिश्चित गर्न बङ्गलाबन्धा बन्दरगाह, फूलबारी स्थल बन्दरगाह (सिल्गुढी सीमा) र काँकडभिट्टा नाका हुँदै नेपाल ल्याइएको थियो।

यस खेपमा चर्चित “खिरसापात” प्रजातिको आँप समावेश थियो। यो भौगोलिक संकेत (GI) प्रमाणित आँप हो, जसलाई भारतीय उपमहाद्वीपमै सबैभन्दा स्वादिष्ट प्रजातिहरूमध्ये एक मानिन्छ।

दूतावासका अनुसार यो पहलले नेपाल–बंगलादेशबीचको दीर्घकालीन मित्रता, सद्भाव र जनस्तरको सम्बन्धलाई अझ मजबुत बनाउने विश्वास गरिएको छ। “म्याङ्गो डिप्लोमेसी” नाम दिइएको यो कार्यक्रम दुई मित्रराष्ट्रबीचको आत्मीयता, सद्भावना र कूटनीतिक सम्बन्धको प्रतीकका रूपमा हेरिएको छ।

बंगलादेशी दूतावासले नेपालमा यो अद्वितीय “आँप कूटनीति” पहललाई भव्य रूपमा सफल बनाउन सहयोग गर्ने सबैप्रति हार्दिक आभार प्रकट गरेको छ।