हामी सबैकाे संसारन्यूज

राजविराज । सप्तरीको शम्भुनाथ नगरपालिकामा दुई वर्षीया बालिकाको हत्या गरेको आरोपमा प्रहरीले एक महिलालाई पक्राउ गरेको छ।

जिल्ला प्रहरी कार्यालय सप्तरीका अनुसार शम्भुनाथ नगरपालिका–२ कन्कपट्टी टोल घर भई हाल वडा नं. ३ ट्राफिक बजारमा बस्दै आएकी २५ वर्षीया मुस्कान भनिने जास्मिन खातुन पक्राउ परेकी हुन्।

प्रहरीका अनुसार भदौ ७ गते बिहान करिब १०ः३५ बजे शम्भुनाथ नगरपालिका–३ स्थित बालिकाको घर पछाडिको झाडीमा दुई वर्षीया बालिका मृत अवस्थामा फेला परेकी थिइन्। मृतककी आमा रुबिना खातुनले दिएको जाहेरीका आधारमा प्रहरीले अनुसन्धान अघि बढाएको हो।

प्रहरीले जास्मिनलाई तत्काल पक्राउ गरी सोधपुछ गर्दा बालिकाको हत्या आफूले गरेको स्वीकार गरेको जनाएको छ। पक्राउ परेकी जास्मिन मृतक बालिकाकी कान्छी आमा रहेको प्रहरीले जनाएको छ।

कर्तव्य ज्यानसम्बन्धी मुद्दा दर्ता गरी सप्तरी जिल्ला अदालतबाट भदौ ७ गतेदेखि लागू हुने गरी पाँच दिनको म्याद थप गरेर थप अनुसन्धान भइरहेको जिल्ला प्रहरी कार्यालय सप्तरीले जनाएको छ।

प्रहरी नायव उपरीक्षक तथा जिल्ला प्रहरी कार्यालय सप्तरीका प्रवक्ता हेमराज घिमिरेद्वारा जारी प्रेस विज्ञप्तिमा घटनाबारे अनुसन्धान जारी रहेको उल्लेख छ।