हामी सबैकाे संसारन्यूज

काठमाडौं । भृकुटीमण्डपमा जारी १८औँ संस्करणको नाडा अटो शो २०२६ मा महालक्ष्मी विकास बैंकले सहभागिता जनाएको छ। भदौ ९ गतेदेखि १४ गतेसम्म सञ्चालन हुने अटो शोमा बैंकले सवारी कर्जा लिन चाहने ग्राहकलाई परामर्श, सहजीकरण तथा समन्वय सेवा उपलब्ध गराइरहेको छ।

बैंकले विकास बैंकहरूमध्ये प्रतिस्पर्धी ब्याजदरमा सवारी कर्जा उपलब्ध गराउँदै आएको जनाएको छ। अटो शोको अवसरमा सवारी कर्जामा आकर्षक ब्याजदरका साथै प्रशासनिक शुल्कमा समेत विशेष छुटको व्यवस्था गरिएको बैंकले जनाएको छ।

बैंकका अनुसार भदौ महिनाका लागि आधार दर ५.६४ प्रतिशत कायम रहेको छ। आधार दरमा आधारित सवारी कर्जा लिने ग्राहकले यसको प्रत्यक्ष लाभ लिन सक्ने बैंकको भनाइ छ।

विद्युतीय तथा अन्य निजी र व्यावसायिक सवारीसाधन खरिद गर्न चाहने ग्राहकलाई सहज, सरल र प्रतिस्पर्धी वित्तीय सेवा उपलब्ध गराउने उद्देश्यले बैंकले अटो शोमा स्टल राखेको हो। सवारी कर्जासम्बन्धी जानकारी तथा सेवाका लागि ग्राहकले अटो शोको हल नम्बर ४ स्थित बैंकको स्टलमा सम्पर्क गर्न सक्नेछन्।

नाडा अटोमोबाइल्स एसोसिएसन अफ नेपालको आयोजनामा प्रत्येक वर्ष हुने अटो शोमा महालक्ष्मी विकास बैंकले नियमित रूपमा सहभागिता जनाउँदै आएको छ।

गुणस्तरीय वित्तीय सेवा प्रदान गर्दै आएको बैंकले हालै काठमाडौंको ज्ञानेश्वरमा कफी लाउञ्जसहितको डिजिटल हबसमेत सञ्चालनमा ल्याएको जनाएको छ।