Sansar News
बुद्धशान्ति । बुद्धशान्ति गाउँपालिकामा किसानहरुले पालेको पशुमा लम्पी स्किन रोग विरुद्धको भ्याक्सिन लगाउन थालिएको छ ।
आर्थिक विकास समितिको सिफारिसमा बुद्धशान्ति गाउँपालिका गाउँ कार्यपालिकाको साउन ३२ गतेको निर्णय बमोजिम साझेदारीमा किसानले पालेको पशुमा आजदेखि लम्पी स्किन रोग विरुद्धको भ्याक्सिन लगाउन थालिएको हो ।
पहिलो चरणमा बुद्धशान्ति वडा नम्बर १,६ र ७ मा आजदेखि खोप लगाउने कार्य सुरु भएको बुद्धशान्ति गाउँपालिकाका प्रवक्ता समेत रहेका आर्थिक विकास समिति संयोजक अनिल वाग्लेले जानकारी दिनुभयो । बुद्धशान्ति गाउँपालिका वडा नम्बर १ का वडाध्यक्ष समेत रहेका आर्थिक विकास समिति संयोजक वाग्लेले ती वडामा खोप लगाउने कार्य सम्पन्न भए लगत्तै बाँकी ४ वटै वडाहरुमा पनि खोप कार्यक्रम चल्ने जानकारी दिनुभएको छ ।
पशुधन संरक्षण गर्न गाउँपालिकाले सो अभियान सञ्चालन गरिएको उहाँले बताउनु भयो । खोप लगाउँदा प्रति पशु किसानले पचास रुपैँया र बाँकी एक सय दश रुपैँया गाउँपालिकाले बेहोर्ने गरी कार्यक्रम सुरु गरिएको पालिकाले जानकारी दिएको छ ।
वि.सं.२०८० भदौ ७ बिहीवार १२:५८ मा प्रकाशित
