हामी सबैकाे संसारन्यूज

काठमाडाैँ । काठमाण्डौंको चण्डोलस्थित विशाल मिलन वैज्ञानिक योग साधना कक्षमा आज बिहान विशेष कार्यक्रमको आयोजना गरिएको छ। नियमित सामूहिक योग साधनापछि योग साधकहरूबीच नव वर्ष २०८३ को उपलक्ष्यमा आपसी शुभकामना आदानप्रदान गरिएको हो।

उक्त अवसरमा योग साधक डा. विज्ञानभिक्षुद्वारा लिखित तथा मकालु ग्रुप अफ कम्पनी प्रा.लि.द्वारा हालै प्रकाशित पुस्तक ‘निजत्वको नियात्रा’ को पनि लोकार्पण गरिएको छ।

पुस्तकको लोकार्पण ८६ वर्षीया आमा शक्तिदेवी आचार्य, गुरु डा. दीपक आचार्य, ८१ वर्षीय योग साधक इन्द्रबहादुर अधिकारी, वरिष्ठ सञ्चारकर्मी धन लामा तथा लेखक डा. विज्ञानभिक्षु स्वयंले संयुक्त रूपमा गरेका थिए।

कार्यक्रमको सञ्चालन तथा पुस्तक समीक्षा योग साधिका वन्दना थापाले गरेकी थिइन्।

लेखक डा. विज्ञानभिक्षु बहुआयामिक व्यक्तित्वका धनी मानिन्छन्। उनी साहित्यकार, कवि, अनुवादक, दार्शनिक, गीतकार तथा गायकका रूपमा समेत परिचित छन्। उनका नेपाली र अंग्रेजी भाषामा विभिन्न कृतिहरू यसअघि नै प्रकाशित भइसकेका छन्।

कार्यक्रममा सहभागीहरूले नव वर्ष २०८३ को अवसरमा सबैको समुन्नति, आरोग्यता र प्रगतिको कामना गर्दै शारीरिक, मानसिक, सामाजिक तथा आध्यात्मिक स्वास्थ्य लाभको शुभेच्छा व्यक्त गरेका छन्।