हामी सबैकाे संसारन्यूज

काठमाडौँ। प्रतिनिधि सभा सदस्य सिताकुमारी रानाले बिहीबार बसेको प्रतिनिधि सभा बैठकमा छाउगोठमा राख्नेहरूलाई कानुनी कारबाही गर्न माग गरेकी छन् ।

उनले अछाम पञ्च देवल विनायक नगरपालिका–२ मा गएको असार ३ गते राती महिनावारी भएकी १६ वर्षीय किशोरी छाउगोठमा बस्दा सामूहिक बलात्कार भएको स्मरण गराउँदै नियम कानुनको प्रत्याभूति गराउन छाउगोठमा राख्नेहरूलाई कारबाही गर्न माग गरेकी हुन् ।
अछामको घटनाले महिलाहरू महिनावारी हुँदा छाउ गोठमा बस्न बाध्य भएको कुरा प्रमाणित गरेको सांसद रानाको दाबी छ ।

‘मुलुकी अपराध संहिता २०७४ को दफा एक सय ६८ ले छाउपडी प्रथालाई फौजदारी अपराध मानेको छ । कर्णाली र सुदूर पश्चिममा छाउपडी प्रथा कायमै छ भन्ने यो घटनाले पुष्टि गर्दछ ।’ उनले भनिन्, ‘अछाममा २०६४ पछि छाउगोठमा बस्न बाध्य १७ जनाका ज्यान गएको छ । यस्ता अपराध रोकथाम गरी छाउगोठमा राख्नेहरूलाई कानुनी कारबाही गरे दण्डहीनताको अन्त्य भएर कानुनीले सार्थकता पाउँछ ।’