हामी सबैकाे संसारन्यूज

काठमाडौँ। नेकपा माओवादी केन्द्रका अध्यक्ष पुष्पकमल दाहाल प्रचण्डले स्थानीय तह उपनिर्वाचनमा कीर्तिपुरको जनमत आफ्नो पार्टीको पक्षमा भएको दावी गरेका छन् । मेयर र वडाका उम्मेदवारहरुको घोषणासभा कार्यक्रमलाई सम्बोधन गर्दै प्रचण्डले यसपटक कीर्तिपुरमा नयाँ इतिहास रच्ने बताएका छन् ।

उम्मेदवारको कारण र पार्टी पनि एकढिक्का भएकाले विजयको आधार बनेको बताउँदै प्रचण्डले भने, ‘अन्य राजनीतिक दलसँगपनि मेरो लगातार कुरा भइरहेको छ । त्यसकारण यसपटक कीर्तिपुरमा नयाँ इतिहास रच्न सकिन्छ ।’

माओवादी केन्द्रले कीर्तिपुरको मेयर उम्मेदवारमा प्रा.डा. शिवशरण महर्जनलाई अघि सारेको छ । माओवादी केन्द्रका अध्यक्ष प्रचण्डले उपनिर्वाचनको परिणाम आफ्नो पक्षमा पार्न आत्मसमीक्षा सहित जनताको घरघरमा, टोलटोलमा र व्यक्तिव्यक्तिलाई भेटेर भोट माग्न निर्देशन दिए ।

जनताका घरघरमा पुगेर भेटेर उनीहरुका कुरा सुन्ने र आफ्ना प्रतिबद्धता सुनाउने काम गर्नुपर्ने प्रचण्डको भनाइ छ । ‘ठूला सभा र समारोह गरेर भोट नआउने बताउँदै प्रचण्डले भने, ‘घरघरमा जानुस् टोलटोलमा जानुस् र आत्मसमीक्षासहित जानुस् ।’

मंसिर १६ गते हुने उपनिर्वाचनमा कीर्तिपुरको मेयरका लागि नेकपा एमालेले डा. सुरेन्द्र मानन्धर र राप्रपाले ध्रुव महर्जनलाई अघि सारेका छन् । सफाइ अभियानकर्मी राजमान मानवले पनि स्वतन्त्र उम्मेदवारी घोषणा गरेका छन् । नेपाली कांग्रेसको उम्मेदवार भने टुंगो लाग्न बाँकी छ ।