हामी सबैकाे संसारन्यूज

काठमाडौं । बजारमा कृत्रिम अभाव सिर्जना गरेर ग्यास लुकाउने, सर्वसाधारणलाई दुःख दिने र महँगोमा बेच्ने कालोबजारीविरुद्ध वाईसिएल नेपाल आक्रामक रूपमा मैदानमा उत्रिएको छ। संगठनले यस्ता गतिविधिलाई सिधै जनतामाथिको लुट भन्दै कडा कारबाहीको चेतावनी दिएको छ।

वाईसिएल नेपालका केन्द्रीय सचिव धिरज उपरकोटा ले स्पष्ट शब्दमा भनेका छन्-“ग्यास लुकाएर कालोबजारी गर्नेहरू अब सुरक्षित छैनन्। जहाँ भेटिन्छन्, त्यहीँ भण्डाफोर गरिनेछ।” उनले आवश्यक परेमा आफैं छापा मार्ने र दोषीलाई जनतामाझ उभ्याउनेसम्मको कदम चालिने चेतावनी दिएका छन्। साथै नेपाल सरकार सँग मिलेर यस्तो आपराधिक गतिविधि नियन्त्रण गर्न पूर्ण सहयोग गर्ने बताएका छन्।

संगठनले विशेष अनुगमन टोली गठन गरेर बजारमा कडा निगरानी सुरु गरिसकेको छ। उक्त टोलीले ग्यास लुकाउने, कृत्रिम अभाव सिर्जना गर्ने र मूल्य बढाएर बेच्ने गिरोहलाई लक्षित गरी निगरानी तीव्र बनाउने जनाएको छ।

वाईसिएल नेपालले सर्वसाधारणलाई पनि चुप लागेर नबस्न आह्वान गरेको छ। जहाँ ग्यास अभाव देखिन्छ तर कालोबजारी भइरहेको छ, त्यस्तो सूचना गोप्य रूपमा दिन आग्रह गरिएको छ। “जनताको साथ पाए, कालोबजारी अन्त्य गर्न धेरै समय लाग्दैन,” संगठनले दाबी गरेको छ।

यो कदमले बजारमा लुट मच्चाउनेहरूका लागि अब चुनौतीपूर्ण अवस्था सिर्जना हुने संकेत दिएको छ।