हामी सबैकाे संसारन्यूज

काठमाडौँ । रसुवा–नुवाकोट क्षेत्रबाट थप ठूलो बाढी आउन लागेको भन्दै विभिन्न माध्यमबाट सूचना तथा फोन सम्पर्कहरू प्राप्त भइरहे पनि हालसम्म त्यस्तो बाढी आउने कुनै विश्वसनीय सूचना प्राप्त नभएको सम्बन्धित निकायले जनाएको छ।

राष्ट्रिय विपद् जोखिम न्यूनिकरण तथा व्यवस्थापन प्राधिकरणका अनुसार प्राप्त सूचना तथा प्रारम्भिक विश्लेषणअनुसार उक्त क्षेत्रमा वर्षा भइरहेकाले नदीको बहाव केही बढ्न सक्ने भए पनि आज बिहानको बाढीभन्दा ठूलो बाढी आउने अवस्था देखिएको छैन।

प्राधिकरणले अपुष्ट सूचना तथा हल्लाको पछि नलाग्न सर्वसाधारणलाई आग्रह गरेको छ। बिहानको बाढीबाट प्रभावित क्षेत्रभन्दा बाहिर सुरक्षित स्थानमा रहेका नागरिकलाई हाललाई थप ठूलो बाढी आउने सम्भावना नरहेकाले अनावश्यक रूपमा नआत्तिन र संयमित रहन आग्रह गरिएको छ।

यद्यपि, आगामी समयमा नेपालतर्फ ठूलो बाढी प्रवेश गर्ने अवस्था देखिएमा सीमा क्षेत्रमा तैनाथ सुरक्षा निकाय तथा सम्बन्धित निकायसँग आवश्यक समन्वय गरी एसएमएसलगायत उपलब्ध सञ्चार माध्यमबाट यथाशीघ्र आधिकारिक सूचना तथा पूर्वसूचना जारी गरिने जनाइएको छ।

सर्वसाधारणलाई आधिकारिक सूचना तथा विश्वसनीय स्रोतबाट प्राप्त जानकारीलाई मात्र आधार मान्न र आफ्नो सुरक्षाका लागि आवश्यक सावधानी अपनाउन आग्रह गरेको छ।