Sansar News
काठमाडौँ । काठमाडौँको जोरपाटीबाट ९२ लाख रुपैयाँसहित २ जनालाई प्रहरीले पक्राउ गरेको छ । काठमाडौँ उपत्यका अपराध अनुसन्धान कार्यालयको टोलीले उनहरुलाई सोमबार राति पक्राउ गरेको हो ।
पक्राउ पर्नेमा रसुवाका जितबहादुर तामाङ र संखुवासभाका सन्तोष खाती रहेका छन् । उनीहरुले कहाँबाट रकम लिएर कहाँ लैजाँदै थिए भन्ने अनुसन्धान भइरहेको उपत्यका अपराध अनुसन्धान कार्यालयका प्रवक्ता एसपी काजीप्रसाद आचार्यले बताए ।
‘२ जना पक्राउ परेका छन् । तर उनीहरुको विषयमा अनुसन्धान भइरहेकाले धेरै कुरा खुल्न बाँकी छ’, एसपी आचार्यले भने ।
प्रहरी उच्च स्रोतका अनुसार भने उनीहरुसँग सुन रहेको सूचनाका आधारमा अप्रेसन चलाइएको थियो । तर, उनीहरुको साथबाट सुरुमा ७७ लाख रुपैयाँ र पछि १५ लाख रुपैयाँ बरामद भएको हो ।
वि.सं.२०८१ पुस १० बुधवार १४:५३ मा प्रकाशित
