Sansar News
काठमाडौं । भदौ २४ गतेदेखि स्थगित भएका सर्वोच्च अदालतका सेवाहरू आजदेखि आंशिक रूपमा सुचारु हुने भएका छन्।
जेनजी आन्दोलनका क्रममा भएको आगजनी, ढुङ्गामुढा, तोडफोड र लुटपाटका घटनापछि अदालतमा बन्दी प्रत्यक्षीकरण र अत्यावश्यक निवेदनबाहेक अन्य सेवा स्थगित गरिएको थियो।
सर्वोच्च अदालतका अनुसार आजदेखि रिट निवेदनहरू दर्ता गर्न सकिने भएको छ। साथै, मुलुकी देवानी कार्यविधि संहिता, २०७४ को दफा १५७ र मुलुकी फौजदारी कार्यविधि संहिता, २०७४ का दफा ७३, १३७ र १५५ अन्तर्गतका निवेदनहरूको दर्ता र सुनुवाइ पनि सुरु हुने बताइएको छ।
तर, अन्य सम्पूर्ण सेवाहरू भने अर्को सूचना जारी नभएसम्मका लागि स्थगित नै रहने अदालतका प्रवक्ता अर्जुनप्रसाद कोइरालाले जानकारी दिएका छन्।
वि.सं.२०८२ असोज २८ मंगलवार ०७:५५ मा प्रकाशित
