हामी सबैकाे संसारन्यूज

काठमाडौं । हमासको आक्रमणबाट मृत्यु भएका नेपाली विद्यार्थी विपिन जोशीको शव नेपाल ल्याउने प्रक्रिया सुरु भएको छ।

मङ्गलवार इजरायलका परराष्ट्र मन्त्रालयका महानिर्देशक बार तालसँग परराष्ट्र सचिव अमृत बहादुर राईबीच टेलिफोन वार्ता भएपछि जोशीको शव नेपाल पठाउने प्रक्रिया औपचारिक रूपमा सुरु गरिएको हो।

वार्ताका क्रममा महानिर्देशक बारले हमासको कब्जामा रहेका जोशीको निधन भएको र शवको पहिचान भइसकेको जानकारी दिएका थिए।

हमासले असोज २७ गते रेडक्रस (ICRC) मार्फत विपिन जोशीको शव इजरायललाई हस्तान्तरण गरेको थियो। त्यसपछि तेल अविवस्थित फरेन्सिक केन्द्रमा डीएनए परीक्षण गरी शवको औपचारिक पहिचान भएको इजरायलस्थित नेपाल दूतावासले जनाएको छ।

नेपाल सरकारले विगत दुई वर्षदेखि जोशीको सकुशल रिहाइका लागि कूटनीतिक तहमा निरन्तर प्रयास गर्दै आएको थियो। तर इजरायल र हमासबीचको युद्धविरामपछि गत अक्टोबर १३ मा भएको भर्चुअल बैठकमा इजरायली अधिकारीहरूले जोशी रिहा हुने बन्दीहरूको सूचीमा नरहेको र उनको अवस्था अज्ञात रहेको जानकारी दिएका थिए।