हामी सबैकाे संसारन्यूज

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने धरौटीमा रिहा हुने भएका छन्। उच्च अदालत तुलसीपुरको बुटवल इजलासले धरौटीमा रिहा गर्न आदेश दिएपछि उनी आज रुपन्देही जाने तयारीमा छन्।

अदालतको आदेशअनुसार धरौटी रकमको बैंक ग्यारेन्टी तयारी भइसकेकाले उनी आजै थुनामुक्त हुने रास्वपा नेताहरूले जनाएका छन्। रुपन्देही पुगेपछि लामिछाने जिल्ला अदालतमा उपस्थित हुनेछन्।

जेलबाट छुटेपछि उनी सिधै चितवन जाने कार्यक्रम रहेको लामिछानेका प्रेस सल्लाहकार प्रमोद न्यौपानेले जानकारी दिए। उनका अनुसार शनिबार चितवनको चौबिसकोटीमा आयोजना हुने कार्यक्रममा लामिछानेले विशेष सम्बोधन गर्नेछन्। त्यसपछि समय मिले शनिबार नै, नत्र आइतबार काठमाडौं फर्किने कार्यक्रम रहेको छ।

रुपन्देहीको बुटवलस्थित सुप्रिम सहकारी ठगी प्रकरणमा यसअघि जिल्ला अदालतले पुर्पक्षका लागि लामिछानेलाई थुनामा राख्न आदेश दिएको थियो। सो आदेशविरुद्ध उनले उच्च अदालतमा निवेदन दिएका थिए। सुनुवाइपछि उच्च अदालतको बुटवल इजलासले लामिछानेको भागमा पर्ने २ करोड ७४ लाख ८४ हजार रुपैयाँ बराबरको बिगोको बैंक ग्यारेन्टी बुझाएर रिहा गर्न आदेश दिएको हो।