हामी सबैकाे संसारन्यूज

काठमाडौं  । शेयर बजारमा पछिल्लो समय उत्साह घट्दै गएको देखिएको छ। नेपाल स्टक एक्स्चेन्ज (नेप्से) परिसूचक लगातार तीन साता दबाबमा पर्दै २६४२ विन्दुमा झरेको छ।

साताको अन्तिम कारोबार दिन सूचक २०.७५ अंकले घटेर २६४२.१५ विन्दुमा बन्द भयो। पछिल्ला तीन सातामा बजारले क्रमशः ‘लोअर हाई’ र ‘लोअर लो’ बनाउँदै ओरालो यात्रा तय गरेको छ, जसले छोटो अवधिको ट्रेन्ड कमजोर बनेको संकेत गर्छ।

माघ तेस्रो सातामा २७७२ विन्दुसम्म पुगेको बजार त्यसयता निरन्तर सुधारभन्दा बढी करेक्सनतर्फ देखिएको छ। विशेषगरी २७००–२७३० विन्दु क्षेत्र बलियो प्रतिरोध (रेजिस्टेन्स) का रूपमा देखिएको छ। उक्त विन्दु पार गर्न नसक्दा लगानीकर्ताले नाफा सुरक्षित गर्ने (प्रोफिट बुकिङ) प्रवृत्ति बढेको विश्लेषण गरिएको छ।

कारोबार रकम भने उल्लेख्य रहँदै आएको छ। दैनिक ७ अर्बदेखि १६ अर्ब रुपैयाँसम्मको कारोबारले बजारमा सक्रियता कायम रहेको देखाए पनि खरिदभन्दा बिक्री चाप बढ्दा सूचकमा गिरावट आएको हो।

विश्लेषकहरूका अनुसार अहिले २६३०–२६४० क्षेत्र तत्कालीन सपोर्टका रूपमा हेरिएको छ। यदि यो विन्दु तल झरेमा बजार २६०० आसपाससम्म झर्न सक्ने अनुमान गरिएको छ।

यद्यपि, उच्च कारोबार रकम र केही कम्पनीमा देखिएको चुनिँदा खरिदले बजार पूर्ण रूपमा निराशाजनक अवस्थामा भने नरहेको संकेत गर्छ। आगामी दिनमा २७०० विन्दु माथि स्थिर हुन सके बजारले पुनः गति लिन सक्ने अपेक्षा गरिएको छ।

लगानीकर्ताले अहिलेको अवस्थामा सावधानीपूर्वक निर्णय लिनु उपयुक्त हुने जानकारहरूको सुझाव छ।