हामी सबैकाे संसारन्यूज

काठमाडौं । एनएमबि बैंक लिमिटेडले भोटेकोशी नदीमा आएको विनाशकारी बाढीबाट प्रभावित नागरिकको राहत तथा पुनःस्थापनाका लागि ३ करोड ६१ लाख रुपैयाँ सहयोग गरेको छ ।

बैंकका सञ्चालक समितिका अध्यक्षले नेपाल सरकारको ‘प्रधानमन्त्री दैवी प्रकोप उद्धार कोष’मा जम्मा हुने गरी ३ करोड ५१ लाख रुपैयाँको चेक अर्थमन्त्रीलाई हस्तान्तरण गरेका छन् ।

त्यसैगरी, बैंकले बाढी प्रभावित क्षेत्रका नागरिकका लागि १० लाख रुपैयाँ बराबरको राहत सामग्रीसमेत उपलब्ध गराएको जनाएको छ ।

अचानक आएको भीषण बाढीका कारण रसुवा, नुवाकोट, धादिङ, गोरखा तथा चितवनलगायत नदी तटीय क्षेत्रमा ठूलो क्षति पुगेको थियो । बाढीबाट जनधनको क्षति हुनुका साथै धेरै परिवार विस्थापित भएका छन् । सडक, स्थानीय पूर्वाधार तथा जलविद्युत् आयोजनामा समेत बाढीले ठूलो असर पुर्‍याएको छ ।

यस कठिन परिस्थितिमा प्रभावित नागरिकको साथमा उभिँदै बैंकले सहयोग उपलब्ध गराएको जनाएको छ । बैंकका अनुसार उक्त सहयोगबाट बाढी प्रभावितको उपचार, खाद्यान्न तथा आवासको व्यवस्था गर्नुका साथै क्षतिग्रस्त संरचनाको पुनर्निर्माण तथा पुनःस्थापनामा सहयोग पुग्ने विश्वास लिइएको छ ।