हामी सबैकाे संसारन्यूज

सुनसरी ।आज बिहान भएको झडपको घटनापछि  जिल्ला प्रशासन कार्यालय सुनसरीले जिल्लाका विभिन्न संवेदनशील क्षेत्रमा अनिश्चितकालीन कर्फ्यु आदेश जारी गरेको छ। प्रमुख जिल्ला अधिकारी बासुदेव घिमिरेले स्थानीय प्रशासन ऐन, २०२८ को दफा ६(क) बमोजिम २०८३ साउन ११ गते बिहान ७:०० बजेदेखि अर्को सूचना जारी नभएसम्म लागू हुने गरी कर्फ्यु आदेश जारी गरेका हुन्।

जारी आदेशअनुसार कर्फ्यु अवधिमा तोकिएका क्षेत्रभित्र कसैले पनि आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक तथा घेराउ गर्न पाउने छैन। प्रशासनले आदेश उल्लङ्घन गर्ने व्यक्तिलाई एक हजार रुपैयाँसम्म जरिवाना वा एक महिनासम्म कैद, वा दुवै सजाय हुन सक्ने जनाएको छ।

कर्फ्यु लागू गरिएका क्षेत्रहरूमा हरिनगरा बजार, भुटाहा बजार, कप्तानगञ्ज बजार, घुस्की बजार र देवानगञ्ज बजार क्षेत्र रहेका छन्। प्रत्येक क्षेत्रमा प्रशासनले पूर्व, पश्चिम, उत्तर र दक्षिणका सीमाना तोकेर कर्फ्यु लागू गरेको छ।

जिल्ला प्रशासन कार्यालयले सर्वसाधारणलाई कर्फ्यु आदेशको पूर्ण पालना गर्न, अत्यावश्यक कामबाहेक घरबाहिर ननिस्कन तथा शान्ति–सुरक्षा कायम राख्न प्रशासनलाई सहयोग गर्न आग्रह गरेको छ।

प्रशासनले परिस्थितिको मूल्याङ्कनपछि आवश्यकताअनुसार थप सूचना जारी गरिने जनाएको छ।

बोलबम यात्राका लागि जाँदै गरेको एक समूहले राति डीजे बजाउँदै हिँडेको थियो।अर्को समूहले त्यसको विरोध गरेपछि विवाद सुरु भयो। विवाद चर्किँदै गएर ढुंगामुढा, तोडफोड र आगजनीसम्म पुगेको प्रहरीले जनाएको छ।

स्थिति नियन्त्रणमा लिन प्रहरीले सुरुमा अश्रुग्यास र चेतावनीस्वरूप हवाई फायर गरेको थियो। अवस्था थप बिग्रिएपछि गोली चलाउँदा देवानगञ्ज–३ का २४ वर्षीय ओमप्रकाश मेहताको मृत्यु भएको र प्रहरीसहित धेरै व्यक्ति घाइते भएका छन्।