हामी सबैकाे संसारन्यूज

कपिलवस्तु, । कपिलवस्तुको महाराजगञ्ज नगरपालिका–२ गैडहवास्थित बहादुरगञ्ज–तौलिहवा हुलाकी सडकखण्डमा ट्रकको ठक्करबाट एक बालकसहित तीन जनाको मृत्यु भएको छ।

प्रहरीका अनुसार नेपालगञ्जबाट विराटनगरतर्फ जाँदै गरेको ना.५ ख २३६४ नम्बरको ट्रकले दुई वटा साइकल र एक पैदलयात्रीलाई ठक्कर दिएको थियो। दुर्घटनामा गम्भीर घाइते भएका तीनै जनाको जिल्ला अस्पताल तौलिहवामा उपचारका क्रममा मृत्यु भएको हो।

मृत्यु हुनेमा महाराजगञ्ज नगरपालिका–२ गैडहवा निवासी १२ वर्षीय आनन्द कश्यप, महाराजगञ्ज नगरपालिका–३ गनौरियाका करिब ४५- ४६ वर्षीय विजयकुमार गुप्ता तथा सोही वडाका करिब ७५ वर्षीय भोल्लर कुर्मी रहेका छन्।

दुर्घटनाका क्रममा ट्रकले सडक छेउमा पार्किङ गरी राखिएको लु १४ प ५५०५ नम्बरको मोटरसाइकललाई समेत क्षति पुर्‍याएको प्रहरीले जनाएको छ।

घटनापछि ट्रक र चालक मोरङको विराटनगर महानगरपालिका–४ निवासी ४२ वर्षीय रोहित राईलाई प्रहरीले नियन्त्रणमा लिएको छ। दुर्घटनापछि केही समय अवरुद्ध भएको सडक अहिले सञ्चालनमा आएको छ।

प्रहरीले घटनाबारे थप अनुसन्धान भइरहेको जनाएको छ।