भविष्यमा रगतको मागलाइ पूरा गर्न थप रक्तदाताको संख्या बढाउनका लागि काठमाडौं उपत्यकाका करिब ५ सय स्कूलका ७० हजार विद्यार्थीहरूमा रक्तदानबारे जानकारीमूलक पर्चा पढ्न लगाइ निबन्ध प्रतियोगिता गराइएको थियो । ६ सय ७० जना विद्यार्थीहरूले रक्तदानबारे निबन्ध लेखेका थिए । उत्कृष्ट हुनेहरू पुरस्कृत भएका थिए ।
शान्ति विद्या गृह माविकी शिशिर वस्ताकोटीले प्रथम पुरस्कार ५० हजार, विद्या संस्कार स्कुलका ओजस्वी दासले द्वितियले ३५ हजार पुरस्कार, अलवर्ट इङ्ग्लिस सेकेण्डरी स्कुलका श्यारोन सुनुवारले तृतिय पुरस्कार १५ हजार र सान्त्वना १० जना सृतिका शर्मा, इभान श्रेष्ठ, अक्षत लाभ, मोहित घिमिरे, अक्षता प्रधान, अञ्जना ठाकुर, श्रीया पराजुली, दिपेन श्रेष्ठ, सागर पाण्डे र आयुष शर्मालाई दुई/दुई हजार रूपैयाँ तथा प्रशंसापत्र प्रदान गरियो । कार्यक्रमका प्रमुख-अतिथि पूर्व उप-प्रधानमन्त्री प्रकाशमान सिंहले यस्तो कार्यक्रबाट भविष्यमा आवश्यक पर्ने रक्तदाता उत्पादन हुने भन्दै कार्यक्रमको प्रशंसा गर्नुभयो । वहॉले समाजमा यस्ता रचनात्मक कार्य गर्नुहुने सबैलाइ धन्यवाद भन्नुहुंदै समाज विकास गर्न आह्वान गर्नुभयो। सोही अवसरमा आयोजित रक्तदान कार्यक्रममा १ सय ८ जनाले रक्तदान गर्नुभएको थियो । कार्यक्रम काठमाडौं माउन्ट एभरेष्ट लायन्स क्लब र शिखर युवा क्लबको संयुक्त आयोजनामा घट्टेकुलो (काठमाडौं) भएको थियो ।
करिब ३ महिनाको अवधिमा भएको रक्तदान उत्प्रेरणा कार्यक्रममा करिब ५ लाख रूपैयाँ खर्च भएको थियो । खर्चका लागि रक्तदाता अर्जुनप्रसाद मैनालीले ३ लाख पन्ध्र हजार रूपैयाँ र बाँकी रकम शिखर युवा क्लबले जुटाएको थियो । विश्व रक्तदान दिवस (जून १४) को सेरोफेरो पारेर कार्यक्रम गरिएको थियो ।
नेपालमा अहिले देशभरि एक दिनमा झन्डै एक हजार जना रगतको खोजीमा रक्तसञ्चार केन्द्र पुग्ने गरेको बताइन्छ । विश्वका धेरैजसो देशमा देशको जनसंख्याको एक प्रतिशतले रक्तदान गरेमा रगतको आधारभूत माग पुग्छ ।
