हामी सबैकाे संसारन्यूज

छिन्नलता गीत पुरस्कार गुठीले २०७४ सालको पुरस्कार तथा सम्मानको घोषणा गरेको छ।  गुठीले २०७४ सालको गीत रचना पुरस्कारबाट ज्ञानेन्द्र गदाललाई पुरस्कृत गरिने घोषणा गरेको छ ।

गदाल २०४० को पुर्वाधबाट नेपाली गीतमा मौलिकता, नविनता, र प्रवृत्तिगत पहिचान स्थापनामा निरन्तर सक्रिय रहेका छन् । उनले ५०० बढी गीतहरू लेखिसकेका छन् भने आधा दर्जन एल्बम प्रकाशन भएका छन् । रेकर्ड भएका १५० बाट दर्जनबढी गीतहरू सदाबाहार चर्चामा रहेका पाइन्छन् । गदालले पुरस्कृत गर्न लागिएको उक्त पुरस्कारको राशी ५१, ००० नगद र सम्मान रहेको जनाइएको छ ।

त्यसैगरी गुठीले संगीत रचनामा बसन्त क्षेत्री र गायनमा संगीता राना प्रधानलाई पुरस्कृत गरिने जनाएको छ।

गुठिले विभिन्न विधाका व्यक्तित्वहरुलाई पुरस्कार तथा सम्मान गर्ने समेत जनाएको छ। गायिका मेलिना राई र गायक संगीतकार राजनराज शिवाकोटीलाई ‘कुटुमा कुटु’ गीतका लागि संयुक्त रुपमा युवा प्रतिभा पुरस्कार दिइने बताइएको छ । त्यस्तै वरिष्ठ संगीतकार शान्ति ठटाल र वरिष्ठ गीतकार शिवशंकर थापालाई छिन्नलता विशेष सम्मान प्रदान गरिने छ।

पुरस्कार र सम्मान गुठीले संस्थापक तथा गीतकार रमोलादेवी शाह छिन्नलताको जन्मजयन्ति पारेर साउन ७ गते एक समारोह बिच हस्तान्तरण गरिने गुठीले जनाएको छ।