हामी सबैकाे संसारन्यूज

१७ जेठ, विराटनगर। प्रदेश नं १ को आज अपराह्नदेखि शुरु भएको बर्खे अधिवेशनको पहिलो बैठकमा सदस्यले मोरङको बूढीगंगा गाउँपालिकास्थित मनमोहन स्मृति पोलिटेक्निकललाई प्रादेशिक प्राविधिक विश्वविद्यालय बनाउनुपर्ने माग गरेका छन् ।

उनीहरुले विराटनगर जुटमिलको भौतिक सम्पत्ति छानवीन हुनुपर्ने र आमाका नाममा छोराछोरीले वंशजका नाममा नागरिक पाउनुपर्ने माग गर्दै बाढी नियन्त्रणका लागि क्षेत्र विकास आकस्मिक कोषको रकम बाँडफाँटमा निर्वाचित सदस्यले समन्वय नगरेको आरोप लगाए ।

यसैगरी सदस्यले प्रदेशको नामकरण र स्थायी राजधानी चाँडै तोकिनुपर्ने, प्रदेश सरकारमा ३३ प्रतिशत महिला मन्त्री हुनुपर्ने, विराटनगर जुट मिल सञ्चालनका लागि प्रदेश सरकारले अध्ययन गर्नुपर्ने, जनयुद्धका छुट भएका सैनिकलाई सम्बोधन गर्नुपर्ने तथा उनीहरुलाई जीविकाभत्ता थप गर्नुपर्ने र अरुण तेस्रो जलविद्युत् सम्झौताबारे जानकारी पाउनुपर्ने बताए । प्रदेशसभामा बोल्नेमा इन्दिरा राई, सावित्राकुमारी रेग्मी, सन्जाकुमारी दनुवार र मोहनकुमार खड्का थिए ।