Sansar News
१० फागनु, काठमाडौं । परराष्ट्रमन्त्री प्रदिप ज्ञवालीले भूपु र्गोर्खाको मुद्दामा लचिलो हुन बेलायतका रक्षा राज्यमन्त्री समक्ष आग्रह गरेका छन् ।
परराष्ट्रमन्त्री प्रदीपकुमार ज्ञवालीसँग आज उनकै कार्यकक्षमा भएको भेटमा मन्त्री ज्ञवालीले भूपू गोर्खा सैनिकका गुनासा सम्बोधनमा अधिकतम लचिलो हुन गरेको आग्रहमा राज्यमन्त्री ल्याङकेष्टरले सकारात्मक जवाफ दिएको मन्त्री ज्ञवालीले बताएका छन् ।
भूतपूर्व गोर्खा सैनिकका समस्या समाधान, उनीहरूका मागको उचित सम्बोधन तथा त्यसको निरुपणलाई आर्थिक दायरामा मात्र सीमित नराखेर योगदानको मूल्याङ्कन हुनुपर्नेमा आफूले जोड दिएको पनि मन्त्री ज्ञवालीले बताएका छन् ।
त्यस्तै नेपाल–बेलायत सम्बन्धका साथै पारस्परिक हित र चासोका सबै विषयमा विचारविमर्श भएको भेटवार्तामा बेलायतबाट नेपाललाई निरन्तर सहायता प्राप्त भएको भन्दै मन्त्री ज्ञवालीले हार्दिक कृतज्ञता व्यक्त गरेका थिए ।
रक्षा मन्त्री ल्याङकेष्टरले पनि संयुक्त अधिराज्यले नेपालको सामाजिक–आर्थिक विकासमा निरन्तर सहयोग गर्ने प्रतिबद्धता व्यक्त गरेको थिए ।
वि.सं.२०७५ फागुन १० शुक्रवार १३:५५ मा प्रकाशित
