हामी सबैकाे संसारन्यूज

२६ फागुन, काठमाडौ । म्यानपावर कम्पनीहरुले सुरक्षाको माग गर्दै आज देशभरी आफ्ना व्यवसाय बन्द गरेका छन् ।
बैदेशिक रोजगार व्यवसायी संघका अध्यक्ष रोहन गुरुङको घरमा शुक्रबार राति नेकपाले विष्फोट गराएपछि असुरक्षित रहेको भन्दै उनीहरुले आइतबार देशभरीका म्यानपावर कम्पनी बन्द गरेका हुन् । व्यवसायीहरुले घटनाका दोषिलाई कारबाही गर्नुपर्ने माग समेत गरेका छन् ।
शुक्रबार राति भएको उक्त विष्फोटमा परी ४ जना घाइते भएको र घरमा आगलागी भएको थियो । घटनाको जिम्मा विप्लव समुहले  लिइसकेको छ ।
‘सरकारसँग सुरक्षाको माग स्वरुप आज बन्द गरिएको हो,’ म्यानपावर व्यवसायी पदम अधिकारीले संसारन्यूज डटकमलाई भने, ‘व्यवसायीहरुको आकस्मिक भेला हुँदैछ भेलामा व्यवसायीहरु अब कसरी जाने भनेर छलफल हुनेछ ।’
यसअघि पनि एकको ज्यानै जानेगरी राजधानीका विभिन्न ठाउँमा विष्फोट गराएको नेकपा विप्लवले उक्त विष्फोटको जिम्मा लिएको थियो । वैदेशिक रोजगार व्यवसाय संघसँग यसअघि विप्लव समुहले चन्दा मागेकोमा व्यवसायीले नदिएको आक्रोशमा यस्तो घटना घटाइएको बताइएको छ ।