हामी सबैकाे संसारन्यूज

२९ फागुन, काठमाडौं । मंगलबार बसेको मन्त्रिपरिषद्को बैठकले विप्लव नेतृत्वको नेकपालाई प्रतिबन्ध लगाएसँग नेपाली समाजमा विभिन्न टिका टिप्पणी उठेका छन् ।

यसै विषयलाई नेकपाका नेता तथा विपक्षी दल नेपाली कांग्रेसका नेताहरुले आ–आफ्नै कोणबाट धारणा व्यक्त गरेका छन् ।

प्रतिपक्षी दल नेपाली कांग्रेसका सभापति शेर बहादुर देउवाले विप्लवलाई कारबाही गर्नुपर्ने बताएका छन् । उनले आफ्नै साथीहरुलाई पनि मार्ने धम्की आएकोले हिंसात्मक गतिबिधिमा लागेको विप्लव समुहलाई सरकारले कानुन अनुसारको कारबाही गर्नुपर्ने विराटनगरमा पत्रकारहरुसँग बताएका थिए ।

त्यस्तै नेकपाका नेता माधव कुमार नेपाल आफ्नै पार्टी नेतृत्वको सरकारसँग असन्तुष्ट देखिएका छन् । उनले प्रतिबन्ध लगाउनु पर्ने कुरामा कुनै छलफल नै नभएको बताएका छन् ।

बुधबार बानेश्वरस्थित संसद् भवनमा पत्रकारहरुलाई प्रतिक्रिया दिदैं यस्तो गम्भीर विषयमा पार्टीभित्रै छलफलै नभएको भन्दै यसमा सरकारलाई साथ दिन नसकिने पनि बताएका थिए ।
त्यस्तै कांग्रेस पार्टी कार्यालयमा आयोजित पत्रकार सम्मेलनमा प्रतिबन्धप्रति पार्टीको धारणा व्यक्त गर्दै प्रवक्ता विश्व प्रकाश शर्माले कम्युनिष्टको रेडबुक पढेर हुर्केकाहरुलाई विस्वासमा ल्याउन नेकपालाई आग्रह गरेका थिए ।

उनले नेपाली कांग्रेसले १२ बुँदे सम्झौता मार्फत् नेकपा माओवादीलाई शान्तिपूण राजनीतिमा ल्याएको उल्लेख गर्दै त्यसबाट पाठ सिक्न प्रधानमन्त्री तथा नेकपाका अध्यक्ष केपी ओलीलाई आग्रह गरेका थिए ।

त्यस्तै नयाँशक्ति पार्टीका संयोजक डा.बाबुराम भट्टराईले सरकारले विप्लव समुहमाथि सरकारले दमन गरेको आरोप लगाएका छन् । उनले नेकपा विप्लव समुहलाई ‘अपराधिक’ भन्दै औपचारिक रुपले प्रतिबन्ध गरेको तथा उसका विरुद्ध राज्यको सुरक्षा शक्ति प्रयोग गर्ने घोषणा गरेको भन्दै विश्व इतिहासका यस्तै चर्चित विडम्वनापूर्ण घटनाको सम्झना गराएको बताएका छन् । उनले सामाजिक संजाल फेसबुकमा लेखेका छन्,‘ एउटा कम्युनिष्ट भन्ने पार्टीको सरकारले अर्को कम्युनिष्ट नै दावी गर्ने समूहलाई यसरी दमन गर्ने तयारी देख्दा विश्व इतिहासका यस्तै केही चर्चित विडम्वनापूर्ण घटनाको सम्झना गराउँछ ।’

त्यस्तै पूर्वमन्त्री तथा नेकपा एमालेका पूर्वनेता रविन्द्र श्रेष्ठले विप्लवलाई प्रतिबन्ध लगाउनु गैरसंबैधानिक कार्य रहेको बताउँदै विप्लवलाई प्रतिबन्ध लगाउने त्यस्तो कुनै कानुनी अधिकार मन्त्रिपरिषद्लाई नभएको बताएका छन् ।