हामी सबैकाे संसारन्यूज

८ साउन, काठमाडौँ । कञ्चनपुरमा गत आर्थिक वर्षको विकास खर्च ८८ प्रतिशत भएको छ । जिल्लामा आएको सङ्घीय र सुदूरपश्चिम प्रदेश सरकाबाट आएको रु चार अर्ब ५५ करोड चार लाख ७५ हजार पूँजीगत बजेटमध्ये रु चार अर्ब ५८ लाख ९२ हजार खर्च भएको छ ।

कोष तथा लेखा नियन्त्रक कार्यालयका प्रमुख कोष नियन्त्रक मणिभद्र न्यौपानेका अनुसार कूल बजेटको ८८ दशमलव १२ प्रतिशत खर्च भएको छ । “अन्यत्रको तुलनामा विकास खर्च सन्तोषजनक नै भयो”, उनले भने । आवको अन्तिममा बजेट थप भएर आउँदा बढी खर्च भएको जानकारी दिए । “असारमा मात्र रु एक अर्ब १६ करोड बजेट थपिएर आएकोे थियो”, न्यौपानेले भने, “निमार्ण योजना समयमै कार्यान्वयन नहुँदा असारमा खर्च बढी हुन्छ ।”

यस्तै कञ्चनपुरका विभिन्न कार्यालयले विकास खर्च गर्न नसक्दा गत आर्थिक वर्षको रु एक अर्बभन्दा बढी बजेट फ्रिज भएको छ । “अधिकांश कार्यालयले ९५ प्रतिशत विकास खर्च गरेका छन्”, नियन्त्रक न्यौपानेले भने, “अघिल्लो आवको तुलनामा जिल्लामा बजेट कम आए पनि खर्च हुन सकेन ।” गत आवमा यहाँ सङ्घीय सरकारको पूँजीगततर्फको बजेट रु चार अर्ब १९ करोड ८० लाख ६१ हजार तथा सुदूरपश्चिम प्रदेश सरकारको रु ३५ करोड २४ लाख १४ हजार बजेट विनियोजित गरिएको थियो । (रासस)