Sansar News
२८ साउन,काठमाडौं । काठमाडौं, उदयपुर, ईलाम र सिन्धुपाल्चोकका विभिन्न स्थानमा भएका आगलागीबाट करिब ५ लाख ४८ हजार रुपैयाँ बराबरको धनमाल जलेर नष्ट भएको छ ।
काठमाडौं महानगरपालिका- ३ महाराजगंजस्थित शिक्षण अस्पतालभित्र रहेको मनमोहन कार्डियोलोजीको पाचौँ तलामा करेन्ट सर्ट भई सोमबार साँझ आगलागी हुँदा उक्त भवनको प्रशासन शाखामा रहेको कोठाभित्रको कम्प्युटर १ थान, फाईल, टेबुल, कुर्सीहरु र ढोका समेत जली क्षति भएको छ ।
उदयपुर, त्रियुगा नगरपालिका -२ स्थित श्रवण कुमार चौधरीको फोटो स्टुडियोमा बिद्युत सर्ट भई सोमबार राति आगलागी हुँदा स्टुडियोमा रहेको प्रिन्ट मेशिन, ल्यापटप, क्यामरा र अन्य सामानहरु जलेर करिब २ लाख ४८ हजार रुपैयाँ बराबरको धनमाल नष्ट भएको छ ।
त्यस्तै ईलाम, सूर्योदय नगरपालिका- ५ शान्ति धारा का योग नारायण प्रधानको गोठमा गाईलाई खोले पकाउने क्रममा सोमबार बिहान आगलागी हुँदा गोठ जलेर करिब ३ लाख रुपैयाँ बराबरको धनमाल नष्ट भएको छ ।
यसैगरी सिन्धुपाल्चोक, मेलम्ची नगरपालिका -५ सिन्धुकोट बस्ने चिरन्जिबी ढकालको घर र गोठमा मंगलबार बिहान आगलागी हुँदा घर र गोठ पूर्णरुपमा जलेर नष्ट भएको छ । साथै आगलागी फैलिएर सोही ठाउँ बस्ने कृष्ण प्रसाद चौलागाईको पिसानी मिल समेत जलेर क्षति भएको छ । आगलागीबाट भएको क्षतिको विवरण हाल खुल्न सकेको छैन ।
स्थानीय बासिन्दा तथा दमकलको सहयोगमा प्रहरीले आगलागी नियन्त्रणमा लिनुका साथै यस सम्बन्धमा थप अनुसन्धान गरिरहेको बताइएको छ ।
वि.सं.२०७६ साउन २८ मंगलवार १३:३० मा प्रकाशित
