हामी सबैकाे संसारन्यूज

४ भदौ, काठमाण्डौं । शालिकराम पुडासैनी मृत्यु प्रकरणको भिडियो किर्ते गरेको भन्दै जनआस्थाका सम्पादक किशोर श्रेष्ठ, नेपाल आज अनलाइनका संकेत कोइराला र चितवनका प्रहरी प्रमुख दान बहादुर मल्ल विरुद्ध उजुरी दिन गएकी रवि लामिछानेकी पत्नी निकिता पौडेललाई काठमाण्डौं प्रहरीले चितवन जान आग्रह गरेको छ ।

टेलिभिजन कार्यक्रम प्रस्तोता रवि लामिछानेकी पत्नी निकिता पौडेल आफ्ना वकिलसँगै भिडियो किर्ते गरेको आरोपमा उजुरी लिएर काठमाण्डौं प्रहरी परिसरमा गएपनि प्रहरीले घटना चितवनकै भएको हुनाले चितवनमै दर्ता गर्न सुझाव दिएको बताइएको छ ।

काठमाण्डौं प्रहरीले शालिकराम पुडासैनीको आत्महत्याको घटना र भिडियो पनि चितवन प्रहरीले नै अनुसन्धान गरिरहेकोले उतै उजरी दिन सल्लाह दिएको बताइएको छ ।

भिडियो किर्ते गरेको आरोपमा तीनजनाविरुद्ध निकिताले काठमाण्डौं प्रहरीमा उजुरी दिन गएको भनिएपनि उजुरी दर्ता नभएपछि उनीहरु फर्किएका थिए ।

महानगरीय प्रहरी परिसर प्रवक्ता तथा एसएसपी श्यामलाल ज्ञवालीले यो केश चितवनको भएकोले उतै उजुरी दर्ता गर्न सुझाव दिएको संसारन्युजलाई जानकारी दिएका छन् । ‘हामीले यहाँ दर्ता गर्न मिल्दैन, यो चितवनको केश हो, उहाँहरुलाई उतै जान सुझाएका छौं । उहाँहरु अहिले उजुरी लिएर सरकारी वकिलको कार्यालयमा जानुभएको छ ।’