हामी सबैकाे संसारन्यूज

काठमाडौँ। भौतिकवादी शिक्षाको तीव्र प्रतिस्पर्धाबीच काठमाडौँस्थित समृद्धि स्कुलले अध्यात्म र विज्ञानको समन्वयमार्फत फरक पहिचान स्थापित गरेको छ। GSPSS (विश्व शान्ति तथा अध्यात्म विज्ञान समाज) बाट दीक्षित तथा गुरु त्यागी अनिल मारुत को मार्गनिर्देशनमा कक्षा ४ र ५ का बालयोगीहरूले कक्षा ११ का विद्यार्थीहरूका लागि दुई दिने विशेष योग शिविर सम्पन्न गरेका छन्।

उक्त शिविरमा सहभागी बालयोगीहरू ‘सर्टिफाइड इन्टरनेसनल योग टिचर’ का रूपमा सक्रिय रहँदै आएका छन्। उनीहरूले डिजिटल माध्यममार्फत विश्वका ४८ देशका साधकहरूलाई नियमित योग प्रशिक्षण प्रदान गर्दै आएको जनाइएको छ। सुप्रिता थापा, मायरा थापा, प्रसिद्धि धरेल, आर्याही श्रेष्ठ, निरुपा घिमिरे, प्रीषा स्थापित, सफल न्यौपाने र प्रेमीषा श्रेष्ठ लगायतका विद्यार्थीहरूले नेतृत्वदायी भूमिका निर्वाह गरेका थिए।

शिविरमा योगासनसँगै मानव शरीरको वैज्ञानिक तथा आध्यात्मिक पक्षबारे विस्तृत जानकारी प्रदान गरिएको थियो।

‘क्वान्टम चेतना’ मार्फत विचारको प्रभाव शरीरमा पर्ने असर, ‘प्राणिक ऊर्जा’ सन्तुलनद्वारा स्नायु प्रणाली व्यवस्थापन तथा ‘अल्फा वेभ मेडिटेसन’ मार्फत स्मरणशक्ति अभिवृद्धिका विधिहरू प्रस्तुत गरिएको थियो। यी अभ्यासहरूले सहभागी विद्यार्थीहरूमा नयाँ ऊर्जा र उत्साह थपिएको बताइएको छ।

यस अवसरमा बालयोगिनी प्रसिद्धि धरेल तथा संयोजक मायरा थापाले गुरु तथा संस्थाप्रति आभार व्यक्त गर्दै उक्त प्रशिक्षणले आत्म-अनुशासन, सकारात्मक सोच तथा आन्तरिक रुपान्तरणमा महत्वपूर्ण भूमिका खेलेको बताए।

कार्यक्रमको उद्घाटन विद्यालयका निर्देशक विकास शाही ले दीप प्रज्वलन गरी गरेका थिए। एकेडेमिक डाइरेक्टर चन्द्रमान महर्जन ले सहभागी बालयोगीहरूलाई सम्मानपत्र प्रदान गरेका थिए।

कार्यक्रममा अन्तर्राष्ट्रिय कराते गुरु रवि शाही तथा प्राविधिक संयोजक दिपेश डंगोल को सक्रिय भूमिका रहेको थियो।

कार्यक्रमको समापन विद्यालयकी पहिलो अन्तर्राष्ट्रिय सर्टिफाइड प्रशिक्षक सुप्रिता थापाले ‘शान्ति पाठ’ मार्फत गर्दै ब्रह्माण्डीय शान्तिको संकल्प व्यक्त गरेकी थिइन्।

संसार न्युजको विश्लेषणअनुसार, बालबालिकाद्वारा सञ्चालन गरिएको यस प्रकारको योग शिविरले ‘शिक्षामा अध्यात्म’ को अवधारणालाई थप सशक्त बनाउँदै बालचेतनाको विकासमा नयाँ आयाम थप्ने संकेत गरेको छ।