हामी सबैकाे संसारन्यूज

२६ मंसिर, सिरहा । सिरहामा एक मजदुर महिलाले आफूलाई जागिरबाट निकालिदिएको भन्दै आत्महत्या गरेकी छन् ।

सिरहा गोलबजार ९ मा रहेको मारुती सिमेन्ट उद्योग व्यवस्थापनले कामबाट हटाएको सूचना जारी गरेको केही क्षणमै गोविन्दपुरकी अनितादेवी पासवानले आत्महत्या गरेको समाचार आजको राजधानी दैनिकमा रहेको छ ।

१५ वर्षदेखि स्थायी श्रमिकका रुपमा कार्यरत अनितालाई अपमानजनक रुपमा कामबाट निकालेर आत्महत्या गर्न बाध्य बनाएको भन्दै आफन्त तथा सोहि कम्पनीमा कार्यरत मजदुरले प्रदर्शन गरेका छन् ।

उद्योग व्यवस्थापन विभागले सोमबार अवकास दिएको सूचना टाँसेको थियो । नियमित कामका लागि मंगलबार बिहान ७ बजे उद्योग पुगेकी अनिता अवकासको सूचना पाएपछि त्यहाँबाट फर्किएर नजिकको रुखमा झुण्डिएको अवस्थामा फेला परेकी थिइन् ।

अनितालाई उद्योग प्रशासनले मंसिर ६ र १३ गते दुईपटक स्पष्टीकरण सोधेको बताइएको छ । प्रशासकिय अधिकृत मोहन शर्माका अनुसार स्पष्टीकरणको चित्तबुझ्दो जवाफ नदिएको भन्दै उनलाई सोमबार सेवाबाट अवकाश दिइएको थियो ।

अनिता उद्योगको अखिल नेपाल औद्योगिक मन्चको सदस्य रहेको समेत बताइएको छ ।