हामी सबैकाे संसारन्यूज

२७ मसिंर काठमाडौँ । स्टार्टअप कम्पनीका नयाँ प्रडक्ट तथा इन्नोभेशनलाई प्रवद्र्धन गर्ने उद्देश्यले ‘आइसिटी स्टार्टअप एन्ड इन्नोभेशन’ मेला आयोजना हुने भएको छ । लिभिङ विथ आइसिटीले आगामी पुस ४ र ५ गते काठमाडौँमा इन्नोभेशन मेला आयोजना गर्ने भएको हो । मेलामा ५० भन्दा बढी कक्षहरू रहनेछन् ।

प्रदेशमा आयोजना गर्दै आएको आइसिटी स्टार्टअप एन्ड इन्नोभेशन मेला यसपटक काठमाडौँमा आयोजना गर्न लागिएको कम्पनीले जनाएको छ । यसअघि गत वैशाख र जेठमा विराटनगर, बुटवल र नारायणगढमा मेला आयोजना भइसकेको छ ।

आइटी तथा इन्नोभेशनमा केन्द्रित नयाँ कम्पनी तथा आइटीका विद्यार्थीले सहभागिता जनाउने उक्त कार्यक्रममा रोबोटहरूको फुटबल प्रतिस्पर्धासमेत हुनेछ ।

नेपालीहरूले बनाएका रकेटदेखि ड्रोन र सफ्टवेयरहरू प्रदर्शनमा राखिनेछ । आइटी रोजगारीसम्बन्धी जब फेयर पनि सञ्चालन हुने उक्त कार्यक्रम काठमाडौँको थापागाउँस्थित प्रेसिडेन्टियल बिजनेस स्कुलको ग्राउन्डमा आयोजना हुने जनाइएको छ । प्रदर्शनीमा १० हजारभन्दा बढीले अवलोकन गर्ने आयोजकको अपेक्षा गरिएको छ ।