Sansar News
३० मंसिर, काठमाण्डौं । चलचित्र विकास बोर्डका अध्यक्ष केशब भट्टराईको मृत्यु भएको छ ।
स्वास्थ्यमा सामान्य समस्या आएर उपचारका लागि ओम अस्पताल चावहिलमा भर्ना भएका ५४ वर्षीय भट्टराईको आइतबार राति १० : २० मा मृत्यु भएको बताइएको छ । उनको मृत्यु हृदयघातबाट भएको जनाइएको छ ।
अनामनगरमा परिवारसहित बस्दै आएका भट्टराईको परिवारमा श्रीमती र छोरा रहेको बताइएको छ । भट्टराई झण्डै तीन दशकदेखि अभिनय तथा चलचित्र निर्माण क्षेत्रमा सक्रिय रहेका थिए । उनी गतवर्षमात्र चलचित्र विकास बोर्डको अध्यक्षमा चयन भएका थिए ।
भट्टराईको शब दिउँसो २ बजेपछि चलचित्र विकास बोर्डमा श्रद्धान्जलिका लागि राखिने र त्यसपछि पशुपति लगेर अन्तिम दाहसंस्कार गरिने बताइएको छ ।
भट्टराईको निधनले चलचित्र उद्योगमा ठूलो क्षति भएको भन्दै नेपाल चलचित्र प्राविधिक संघ परिवारले दुःख व्यक्त गरेको छ । संघका अध्यक्ष पुष्कर लामाले आज चलचित्र क्षेत्रसँग सम्बन्धीत कुनै पनि सुटिङ लगायतका कार्य सम्पादन नगर्न सम्बन्धीत सबैलाई अनुरोध गरेका छन् ।
वि.सं.२०७६ मंसिर ३० सोमवार ०८:४२ मा प्रकाशित
