Sansar News
३० मंसिर, काठमाण्डौं । नेपाल कम्युनिष्ट पार्टी (नेकपा) को स्थायी समितिको चौथो बैठक सम्पन्न भएको छ ।
पार्टी कार्यालय धुमबाराहीमा अध्यक्ष प्रचण्डको अध्यक्षतामा बसेको स्थायी समितिको आजको बैठकमा आइतबार अध्यक्ष प्रचण्डले प्रस्तुत गरेको राजनीतिक प्रतिवेदनमाथि नै छलफल तथा नेताहरुले आ–आफ्नो धारणा राख्ने क्रम चलिरहेको छ ।
बैठकमा अध्यक्षद्धयको राजनीतिक प्रतिवेदन र महासचिव विष्णु प्रसाद पौडेलद्धारा प्रस्तुत विधान संशोधन प्रस्तावमा नेताहरुले सुझावसहित आ–आफ्ना धारणा राख्नेक्रम चलिरहेको छ ।
आज स्थायी कमिटीका १२ जना सदस्हरुले प्रतिबेदन संशोधन प्रस्तावमाथि आ–आफ्ना धारणा राखेको पार्टी प्रवक्ता तथा नेता नारायणकाजी श्रेष्ठले जानकारी दिएका छन् ।
आजको बैठकमा वामदेव गौतम, अष्टलक्ष्मी शाक्य, भीम रावल, योगेश भट्टराई, पम्फा भुसाल, देवेन्द्र पौडेल, गणेश साह, छविलाल विश्वकर्मा, मुकुन्द न्यौपाने, अग्नि सापकोटा, युवराज ज्ञवाली र देव गुरुङले प्रस्तुत प्रस्तावहरुमा उल्लेखित वैचारिक, संगठनात्मक र राजनीतिक दिशा एवं विश्लेषण आधारभूत रुपमा सही रहेको धारणा राख्दै कतिपय परिमार्जन र सुधारका लागि सुझावसमेत प्रस्तुत गरेका थिए ।
उनीहरुले संगठन सुदृढीकरण तथा सरकारको कामलाई प्रभावकारी बनाउनसमेत आ–आफ्ना सुझाव राखेका छन् । स्थायी समितिको पाँचौ बैठक भोलि पुस १ गते बिहान ११ बजे धुम्बाराहीमा बस्ने बताइएको छ ।
वि.सं.२०७६ मंसिर ३० सोमवार १७:३० मा प्रकाशित
