हामी सबैकाे संसारन्यूज

१८ पुस, काठमाडौं । सरकार र आन्दोलनरत सर्लाहीका उखु किसानबीच पाँचबुँदे सहमति भएको छ । उद्योग, वाणिज्य तथा आपूर्ति मन्त्रालयमा मन्त्री लेखराज भट्टको उपस्थितिमा पाँच बुँदे सहमति गरेको हो । सहमति भएसँगै किसानहरुले आन्दोलन स्थगित गर्न सहमत भएका छन् ।

सहमतिअनुसार चिनी मिल सञ्चालकहरुले माघ ७ गतेभित्र किसानको बक्यौता उपलब्ध गराउने र त्यसको समन्वय तथा सहजीकरण मन्त्रालयले गर्ने उल्लेख छ । किसानहरुको हरेक वर्ष देखिने भुक्तानी समस्याको दिगो समाधान गर्न र उखु खरिद बिक्री गरेको रकम भुक्तानी दिने प्रणालीलाई स्वचालित बनाउन मन्त्रालयका सहसचिवको संयोजकत्वमा चिनी उद्योगी, किसान र विज्ञ रहेको कार्यदल बनाउने सहमतिमा जनाइएको छ ।

सहमतिमा उखु किसान संघर्ष समितका सचिव हरिश्याम राय र मन्त्रालयका प्रवक्ता दिनेश भट्टराईले हस्ताक्षर गरेका छन् ।

यसअघि उखु किसान संघर्ष समितिले सरकारसँग १२ बुँदे माग अघि सारेको थियो ।