२० पुष, काठमाण्डौं । अष्ट्रेलियाको सिड्नीमा रहेका दुई नेपाली युवाको डुबेर मृत्यु भएको छ ।
क्याम्पिङमा गएका २६ र २३ वर्षीय विशाल सेढाई र रोशन छत्कुलीको पानीको दलदलमा भासिएर मृत्यु भएको अष्ट्रेलियाबाट संचालित MNTV Australia ले समाचार प्रकाशित गरेको छ ।
शुक्रबार (जनवरी ३) क्याम्पिङका लागि स्थानीय बरोअरा नेशनल पार्कमा गएका उनीहरु पानीमा भासिएपछि राति ७ :३० बजे आपतकालिन सेवामार्फत् उद्धार गर्ने क्रममा डुबिरहेका प्रदिप पाण्डेलाई उद्धार गरेर हेलिकप्टरमार्फत् अस्पताल पुर्याइएको थियो भने छत्कुली र सेढाईको शब राति ११ :३० बजे मात्र दलदलबाट निकालिएको उक्त एमएनटिभी अष्ट्रेलियाले जनाएको छ ।
दिउँसो देखि क्याम्पिङमा गएका उनीहरु साँझपरेपछि पानीमा पौडिका लागि गएका थिए । त्यहिबेला उनीहरु दलदलमा फसेका थिए ।
डुबेर मृत्युहुनेमा सेढाई पेशाले इन्जिनियर रहेको बताइएको छ । पढाई सकेर उनी १ वर्षदेखि आफ्नो पेशामा आवद्ध थिए ।
स्मरण रहोस् विहिबार ( जनवरी २) मा पनि अष्ट्रेलियास्थित अरेन्ज शहरको नजिकै क्यानोबोल्स नदीमा डुबेर २७ वर्षीय नेपाली युवाको मृत्यु भएको थियो । उनको परिवारको अनुरोधमा उनको नाम खुलाइएको छैन । ती युवा पनि आफ्ना दुई साथिहरुसँग नदीमा पौडिखेल्न पुगेका थिए ।
अध्ययनका लागि अष्ट्रेलिया पुगेका विद्यार्थीहरु पछिल्लो पटक पौडिने क्रममा डुबेर मृत्यु भएको समाचार बढ्न थालेका छन् ।
वि.सं.२०७६ पुस २० आइतवार ०९:२२ मा प्रकाशित
