हामी सबैकाे संसारन्यूज

२४ माघ, काठमाडौं । अस्ट्रेलियाको डढेलो फैलिरहेको पूर्वी तटीय क्षेत्र न्यु साउथ वेल्स पानी परेको छ । लगातार परेको मुसलधारे पानीले अहिलेसम्म एक तिहाइ डढेलो निभेको र अझै आगो निभाउन सक्ने अधिकारीहरुले बताएका छन् ।

पानी परेपछि न्यु साउथ वेल्समा मात्रै ६० मध्ये २० ठाउँमा लागेको डढेलो निभेको छ । आगो निभाउन सहयोग भएपछि धेरैले खुसियाली मनाएका छन् ।चार महिना भन्दा बढी समयदेखि लागेको अस्ट्रेलियाको डढेलो नियन्त्रण बाहिर गएको थियो ।

तर मौसमविद्ले सिड्नीसहित अन्य तटीय क्षेत्रमा बाढी आउन सक्ने भन्दै चेतावनी दिएका छन् । गएको सेप्टेम्बरदेखि अस्ट्रेलियाका विभिन्न ठाउँमा फैलिरहेको डढेलोका कारण अहिलेसम्म ३३ जनाको ज्यान गैसकेको छ भने एक करोड हेक्टर जमिनमा क्षति पुगिसकेको छ ।

अधिकारीहरुले यो आगलागी गएको दुई दशककै सबैभन्दा भयानक र खतरनाक भएको बताएका छन् । आगलागीबाट मुख्य प्रभावित दक्षिणी क्षेत्रमा मात्र १८ हजार पाँच सयभन्दा बढी हेक्टर जमिन सखाप भइसकेको छ ।