हामी सबैकाे संसारन्यूज

३० फागुन, काठमाडौं । नेपाली कांग्रेसका वरिष्ठ नेता रामचन्द्र पौडेलले अन्दाजका भरमा नेता कार्यकर्तामाथि अनुशासनको कारबाही गरिएको भन्दै आपत्ति जनाएका छन् । शुक्रबार विज्ञप्ति जारी गरेर नेता पौडेलले खुलेआम अन्तर्घात गर्नेसँगै निर्दोशलाई पनि कारवाही हुन नहुने जनाए।

तनहुँका कांग्रेस नेता गोविन्दराज जोशीलाई गरिएको अनुशासनको कारबाहीसँगै तुलना गरी अन्यलाई कारबाही गर्नु न्यायसंगत नहुने उनको धारणा छ। ‘स्वयं वागी उम्मेदवार बनेर खुलेआम अन्तर्गत गर्ने व्यक्ति र आफूलाई मन परेन भन्दैमा अन्दाजको भरमा आरोपित कार्यकर्तालाई सँगै जोडेर कारबाहीको नाटक जो मञ्चन गरिएको छ।’ उनले भनेका छन्।

जोशीकै कारबाहीको रुपमा अन्यलाई पनि कारबाही गर्न लागिएको प्रति उनले आपत्ति जनाएका हुन्। अनुशासनको कारबाहीको प्रक्रिया प्रति आपत्ति जनाउँदै उनले भने, ‘यो घृणित षडयन्त्र हो। यस्तै षडयन्त्र र अनेक विकृत उपाय अबलम्बन गरी सत्तामा हावी भैरहन चाहने प्रवृत्तिसँग मेरो लडाइँ जारी छ।’

अनुशासन समितिले जोशीसहित कैलालीका नेता पुष्कर ओझा, नेपालगञ्जका महेन्द्र मल्ल र डडेल्धुराका पार्टी कार्यालय सचिव रामबहादुर विष्टलाई स्पष्टिकरण सोधेको थियो। पाँच सदस्यीय अनुशासन समितिले सर्वसहमतिमा मात्रै कारबाही सिफारिस गर्ने कार्यादेश पार्टीको छ।