हामी सबैकाे संसारन्यूज

काठमाडौँ । राष्ट्रिय प्रजातन्त्र पार्टी (राप्रपा)ले बागमती प्रदेश सभाका सदस्य तथा संसदीय दलका नेता उद्धव थापामाथि पार्टीको निर्णयविपरीत गतिविधि गरेको भन्दै कडा अनुशासनात्मक कारबाही गरेको छ।

राप्रपाले पार्टीको निर्णयविपरीत बागमती प्रदेश सरकार गठनमा समर्थन दिने कार्यमा थापा संलग्न भएको ठहर गर्दै उक्त गतिविधिलाई गम्भीर अनुशासन उल्लंघनका रूपमा लिएको जनाएको छ। केन्द्रीय अनुशासन समितिको सिफारिसका आधारमा थापालाई प्रदेशसभा सदस्यबाट पदमुक्त गर्ने, पार्टी सदस्यबाट निलम्बन गर्ने तथा त्यसबारे बागमती प्रदेशसभालाई जानकारी पठाउने निर्णय गरिएको हो।

थापा राप्रपाबाट काठमाडौं–८ (२) बाट प्रत्यक्ष निर्वाचित प्रदेशसभा सदस्य हुन्। उनी २०७९ पुसमा राप्रपा बागमती प्रदेश संसदीय दलको नेतामा सर्वसम्मत चयन भएका थिए। प्रदेश सरकार गठनलाई लिएर पछिल्लो समय राप्रपाभित्रै मतभेद देखिएको थियो। बागमतीमा सरकार गठनका लागि राप्रपाको समर्थन निर्णायक बन्न सक्ने अवस्था बनेपछि पार्टीभित्र सरकारमा सहभागी हुने र नहुने विषयमा दुई धार देखिएको थियो।

यसअघि राप्रपाको केन्द्रीय नीति प्रदेश सरकारमा सहभागी नहुने रहेको उल्लेख हुँदै आएको भए पनि बागमतीमा संसदीय दलका नेता थापा पक्षका सांसदहरू सरकार गठनको प्रक्रियामा सक्रिय देखिएका थिए। थापा पक्षले नयाँ सत्ता समीकरणलाई समर्थन गर्ने संकेत दिएको समाचारहरू सार्वजनिक भएका थिए।

पार्टीको निर्णयअनुसार थापालाई प्रदेशसभा सदस्यबाट पदमुक्त गर्न प्रदेशसभालाई जानकारी पठाइने भएपछि उनको सांसद पदसम्बन्धी प्रक्रिया थप संवैधानिक तथा कानुनी प्रक्रियामा जाने देखिएको छ। साथै, पार्टी सदस्यबाट निलम्बनको निर्णयले राप्रपाको बागमती प्रदेश संसदीय दलमा समेत नेतृत्व र समीकरण परिवर्तनको अवस्था सिर्जना गर्न सक्नेछ।