हामी सबैकाे संसारन्यूज

नवलपुर । पूर्वी नवलपरासीको गैँडाकोट नगरपालिका–१४, भागरबाट हराएका साढे दुई वर्षीय बालक तीन दिनपछि सामुदायिक वन क्षेत्रबाट सकुशल फेला परेका छन्।

भागर निवासी हेमकुमारी आले च्याउ टिपेर घर फर्कने क्रममा उनका साढे दुई वर्षीय नाती हराएपछि परिवारमा ठूलो चिन्ता छाएको थियो। अबोध बालक कहाँ पुगे भन्ने पत्तो नलागेपछि परिवारसँगै स्थानीयवासीसमेत खोजीमा जुटेका थिए।

बालकको खोजीका लागि स्थानीयवासीसँगै नेपाल प्रहरी र सशस्त्र प्रहरी परिचालन भएका थिए। सशस्त्र प्रहरी बल नेपाल औद्योगिक सुरक्षा बेस, प्रगतिनगरबाट सशस्त्र प्रहरी निरीक्षक कृष्णबहादुर पौड्यालको कमाण्डमा १० जनाको टोली खोजीमा खटिएको थियो।

त्यस्तै, इलाका प्रहरी कार्यालय रजहरबाट प्रहरी निरीक्षक भरत थापा क्षेत्रीको नेतृत्वमा सात जनाको प्रहरी टोली पनि खोजीमा परिचालन गरिएको थियो।

लगातारको खोजीपछि भदौ ४ गते बिहान करिब १० बजे बालक घरबाट करिब १।५ किलोमिटर उत्तरतर्फ रहेको जंगलमा सकुशल फेला परेका हुन्।