हामी सबैकाे संसारन्यूज

१९ बैशाख, काठमाण्डौं । प्रधानमन्त्री केपी शर्मा ओलीले कोरोना भाइरसको महामारीका कारण नेपालको श्रमको संसार अहिले लकडाउनमा रहेको बताएका छन् ।

प्रधानमन्त्री ओलीले शुक्रबार अन्तर्राष्ट्रिय श्रमिक दिवसको अवसरमा शुभकामना दिँदै यतिबेला विश्वभरिका कोरोना प्रभावित २१० मुलुकमा जस्तै नेपालको पनि उत्पादन प्रणालीको कडी टुटेको र सिर्जनशील हातहरु यतिखेर लकडाउनका परेको तथा श्रमको प्रतिक्षामा रहेका उत्पादनका साधनहरु पनि लकडाउनमा रहेको बताएका छन् ।

तर, यस्तो विषम परिस्थितिमा घरमुलीले अनिकालमा पनि परिवारलाई भोकै नराख्ने र रुखोसुखो भरणपोषणको जोगावट गरेर व्यवहार चलाउने बताएका छन् । ‘तपाईहरुको यस प्रधानमन्त्रीले नेतृत्व गरेको सरकारले पनि उपलब्ध स्रोत र साधनले भ्याएसम्म सुविधाको जोगावट गर्छ ।’  नेपाल कम्युनिष्ट पार्टी ( नेकपा) का अध्यक्ष समेत रहेका   ओलीले शुभकामना सन्देशमा भनेका छन् ।

प्रधानमन्त्रीले अहिलेको लकडाउन विश्वव्यापी रहेको र यो बाध्यकारी रहेको बताउँदै भनेका छन् ‘कोरोना भाइरसका कारणले यसलाई स्वीकार्नु परेको बाध्यता हाम्रा अगाडि छ । यसले निर्माण, रोजगारी र उत्पादनमा पारेको प्रतिकूल प्रभावको अवस्थाले श्रमजीवी वर्गको बुझाईजस्तै श्रम र उत्पादनको सम्बन्ध एवं त्यसको महत्वलाई सबै वर्गले गम्भीरताका साथ बुझ्ने नयाँ परिस्थिति पनि निर्माण भएको छ । श्रम आधारभूत कुरा हो र जीवन प्रमुख कुरा हो । श्रम बिनाको पूँजी र प्रविधि पनि अर्थहीन हुन्छ भन्ने आजको यथार्थले स्पष्ट पारेको छ ।’

उद्योग–व्यवसाय बन्द हुँदा आम्दानी घटेका स्वदेशमा कार्यरत सबै प्रकृतिका श्रमिकहरुका कष्टकर जीवनप्रति म अत्यन्तै दुःखी रहेको बताउदै उनले भनेका छन्, ‘एक दशकको हिंसात्मक द्वन्द्वका कारण गाउँको रोजगारी खोसिँदा शहररबजार पसेका, तर शहररबजारले रोजगारी दिन नसक्दा परदेश भासिएका लाखौं नेपाली युवा श्रमिकहरु विभिन्न मुलुकमा कार्यरत छन् । युवाहरु विदेशिने यी र अन्य विभिन्न बाध्यकारी परिस्थिति तथा प्रवृत्ति पनि छन् । र, अहिले कोरोना भाइरसको महामारीका कारण ‘न कार्यरत मुलुकमा रम्न सकिने, न त स्वदेश फर्किन सकिने’ चेपुवामा श्रमिकहरू परिरहेका छन् । यसबाट सिर्जना भएको पीडाप्रति म जानकार तथा संवेदनशील छु । यस अप्ठ्यारो घडीमा स्वदेश तथा विदेशमा रहनु भएका सम्पूर्ण श्रमजीवी नेपाली दिदीबहिनी तथा दाजुभाइहरुमा हार्दिक ऐक्यबद्धता जाहेर गर्दछु ।’

प्रधानमन्त्रीले वैदेशिक रोजगारीबाट फर्किएकाहरुलाई उनीहरुले हासिल गरेको दक्षता अनुरुपको स्वरोजगारी सिर्जना गर्न सरल कर्जा र प्रविधि हस्तान्तरणको प्रबन्ध गरिने तथा स्वदेशमा रहेका वा विदेशमा रोजगारीमा जान नपाएकाहरुलाई प्रधानमन्त्री रोजगार कार्यक्रममा जोडिने बताएका छन् । उनले विभिन्न मन्त्रालय, निकाय र सार्वजनिक संस्थाहरु मार्फत सिर्जना भएका कामका अवसरहरु नेपालीलाई नै सुनिश्चित गर्ने व्यवस्था मिलाइने समेत बताएका छन् ।