हामी सबैकाे संसारन्यूज

१ जेठ, काठमाण्डौं । सर्वोच्च अदालतले तत्काल पिसीआर प्रविधिबाट परीक्षण बढाउन सरकारका नाममा आदेश जारी गरेको छ ।

न्यायाधिश डा. मनोज कुमार शर्माको इजलासले पिसीआर परीक्षणको दायरा बढाउन र त्यसको अभाव हुन नदिन विहिबार सरकारका नाममा आदेश जारी गरेको हो ।

अधिवक्ता कमल बहादुर खत्रीलगायतले बैशाख २९ गते प्रधानमन्त्री तथा मन्त्रिपरिषद्को कार्यालयलगायतलाई विपक्षी बनाएर रिट दायर गरेका थिए । उक्त रिटको सुनवाई गर्दै सर्वोच्चले सरकारको नाममा उक्त आदेश जारी गरेको हो ।

‘यसमा अन्तरिम आदेश माग गरेतर्फ हेर्दा प्रस्तुत रिट निवेदन कोभिड १९ सँग सम्बन्धीत रहेको र हालको परिस्थितिमा तत्काल रोग नियन्त्रण गरी आम नागरिकको जीवन रक्षा गर्नुपर्ने अवस्था रहेकोले तत्काल पिसीआर परीक्षणको दायरा बढाउनेतर्फ र सोको अभाव नहुनेतर्फ आवश्यक पहल गर्नु ।’ सर्वोच्चको आदेशमा भनिएको छ ।